बर्च प्रकरणानंतर झारखंडला पळून गेलेला संशयित सापडला, महिन्यानंतर ‘ऑपरेशनल मॅनेजर’ ताब्यात; महत्त्वाची माहिती मिळण्याची शक्यता

म्हापसा: हडफडे येथील बर्च बाय रोमियो लेन क्लब अग्नितांडव प्रकरणी क्लबचा ‘ऑपरेशनल मॅनेजर’ बिजय कुमार सिंग (३८, रा. झारखंड) याला अटक केल्यानंतर त्याची पोलिस कोठडीत रवानगी करण्यात आली आहे.

ट्रान्झिट रिमांडवर हणजूण पोलिसांनी त्याला तब्बल एक महिन्यानंतर पकडले आहे. या संशयितास स्थानिक न्यायालयाने ८ दिवसांची पोलिस कोठडी सुनावली. बर्च दुर्घटनेनंतर संशयित आपल्या मूळ गावी पळून गेला होता.

उल्लेखनीय म्हणजे, दुर्घटनेच्या दिवशी संशयित बिजय सिंग हा क्लबस्थळी हजर होता. या भीषण आग प्रकरणात हणजूण पोलिसांकडून आतापर्यंत ९ जणांना अटक झाली आहे.

क्लबचे दैनंदिन व्यवहार पाहत होता

संशयित कॉर्पोरेट/मुख्य जनरल व्यवस्थापक राजीव मोडक याने दाखल केलेल्या आपल्या जामीन अर्जात ऑपरेशनल मॅनेजर बिजय कुमार सिंग याच्या नावाचा उल्लेख केला होता.

क्लबचे दैनंदिन व्यवहार हा बिजय कुमार सिंगच आणि इतर असोसिएट या क्लबचा व्यवहार पाहत होता आणि तोच बर्च दुर्घटनेला जबाबदार असून आपणास जामीन द्यावा, असे मोडक याने आपल्या जामीन अर्जात दावा केला होता.