Goa Road Accident: वाहनचालकांच्या बेफिकीर वृत्तीमुळेच अपघात

Goa Road Accident गोव्यात हल्ली होणारे अपघात बघितल्यास  गाडी चालवणे भीतीचे वाटत आहे. राज्यातील अपघातांमधील बळीही वाढत आहेत. 

काही नागरिकांना  याविषयी विचारले असता बहुतेकांना वाटतेय की वाहनचालकांची बेफिकीर वृत्ती आणि हलगर्जीपणामुळेच जास्त अपघात होतात. 

जशी गोव्यात वाहनांची संख्या वाढत आहे, तशी अपघातांची संख्याही वाढतेय. पोलिस यंत्रणेकडून कडक कारवाई, रस्ते सुरक्षा आठवडे, रस्ते अपघातांविषयी जागृती करूनही त्याचा हवा तेवढा फायदा होताना दिसत नाही. 

या रस्ते अपघातांमागची कारणे काय असू शकतील, याबाबत जाणकरांची मते जाणून घेतली. 

वाढते अपघात हे फक्त बेजबाबदार वाहन चवलण्याने न होता त्यामागे आणखीन घटक कारणीभूत आहेत.

यंदाच्या एप्रिल महिन्यात जे अपघात झालेत त्यात बरेचसे अपघात हे वाहनचालकाला डुलकी लागल्याने झालेत. अचानक वाढलेल्या उष्णतेचा थेट परिणाम जास्त करून दुचाकी चालकांवर झाला. - रोलंड मार्टिन्स, संयोजक, गोवाकॅन

गोव्यात घडणारे रस्ते अपघात थांबवणे एवढे सोपे नाही. गोव्यात जे पर्यटक येतात ते जास्त वेळ भाड्याने गाड्या चालवायला घेतात आणि बेफाम गाड्या चालवतात.

राष्ट्रीय महामार्गावरील अपघात हे अतिवेगाने गाडी चालवल्यामुळे होतात. त्यात वाहनचालकांचा बेफिकीरपणा हा अपघातास कारणीभूत ठरतो. - परशुराम सोनुर्लेकर, अध्यक्ष, गोवा फर्स्ट

गोव्यात लोकांना रुंद रस्ते दिसले की ते आपली वाहने सुसाट चालवतात. दारू पिऊन, बेशिस्तपणे व सुसाट वेगाने गाडी चालवल्यामुळे अनेक अपघात होतात.

गोव्यात येणारे काही पर्यटक तसेच काही स्थानिक लोकही नियम धाब्यावर बसवून वाहने चालवतात, हे बंद झाले पाहिजे तरच अपघातांवर नियंत्रण ठेवता येईल.

- आदित्य शेणॉय भांगी, हिंदी साहाय्यक प्राध्यापक, गोवा विद्यापीठ

रस्त्यावर वाहनांची रहदारी वाढल्यामुळे अपघातही वाढले आहेत. अगोदर लोक संयमपूर्वक गाड्या चालवायचे. आजची पिढी ही सुसाट गाड्या चालवताना दिसत आहे.

बाहेरून येणारे पर्यटक तर गोव्यात आल्यावर नियमांना तिलांजली देऊन आपल्याला वाटते तशा गाड्या चालवतात. त्यामुळे बहुतेक पर्यटनस्थळांवर अपघात होतात.

- संजय बर्डे, नेते, राष्ट्रवादी काँग्रेस पक्ष