म्हापशातील आजींचा मतदानासाठी उत्साह, ऊनाची पर्वा न करता बजावला हक्क

मतदानाचा हक्क बजावण्यासाठी गोमंतकीय आज कामकाज बाजूला ठेऊन घराबाहेर पडले आहेत. राज्यात सर्व मतदान केंद्रांवर मतदार रांगेत उभे बघायला मिळत आहेत. यामध्ये नव मतदारांपासून ते ज्येष्ठ नागरिकांपर्यंत सर्वांचा समावेश आहे. लोक कोणत्या राजकीय पक्षाला (Political Party) जनादेश देणार हे 10 मार्च रोजी स्पष्ट होणार असले तरी लोकांचा मतदानासाठीचा उत्साह आज गोव्यात बघायला मिळत आहे. (Senior citizen in goa)

लोकशाहीवरील (Democracy) विश्वासाखातर म्हापसा येथील ज्येष्ठ नागरिक सुशिला बांदेकर रणरणत्या उन्हातदेखील मतदान करण्यास घराबाहेर पडल्या. मतदान केल्यानंतर गोमन्तकशी बोलताना त्यांनी आपल्या भावना व्यक्त केल्या. त्या म्हणाल्या, "मला नीट बोलताही येत नाही, चालताही येत नाही. पण माझा उमेदवार जिंकावा म्हणून मी मतदान केले आहे. मी ज्या उमेदवाराला मतदान केले त्याला जास्तीत जास्त मते मिळतील आणि तोच सत्तेवर येईल, असेही त्या म्हणाल्या.

सुशिला बांदेकर आपल्या कुटुंबातील सदस्यांबरोबर मतदान करण्यास आल्या होत्या. त्यांना चालताना त्रास होत होता, मात्र तरीही एखाद्या तरुणाला लाजवेल अशा उत्साहात त्यांनी आपला मतदानाचा हक्क बजावला. यावेळेस त्यांनी कोरोना (Coronavirus) निर्बंधांचे पालन करत मास्क घातला होता. डोळ्यावर भिंगांचा चष्मा आणि तोंडावर मास्क घालून मतदान केंद्रावर आलेल्या आज्जी या नवमतदारांना न चुकता मतदान करण्याचा संदेश देऊन गेल्या.