Goa Rain Update: आज वादळी वाऱ्यासह जोरदार पावसाची शक्यता; पावसाचा सव्वाशे इंचांचा टप्पा पार

पणजी: राज्यात पावसाने गेल्या काही दिवसांपासून जोर धरला असून आतापर्यंत ३,१९८.६ मिमी म्हणजेच १२५.९२ इंच पावसाची नोंद केली आहे. सरासरी पावसाच्या तुलनेत ५५.५ टक्के अधिक पावसाची नोंद केली आहे.

गेल्या २४ तासांत एकूण ४५.९ मिमी पावसाची नोंद केली. सांगेत सर्वाधिक १०६.२ मिमी पावसाची नोंद केली आहे. केपेत ८५ मिमी, काणकोण ६४ मिमी, मडगाव ५२ मिमी, फोंडा ४८ मिमी, वाळपई ३९.८ मिमी, पेडणे ३७.४ मिमी, दाबोळी ३३ मिमी, जुने गोवे २८.४ मिमी, साखळी २४.६ मिमी, म्हापशात ७ मिमी पावसाची नोंद केली.

दाबोळी वगळता सर्वत्र पावसाचे शतक

सर्वाधिक ३,९७९.५ मिमी पावसाची नोंद वाळपई येथे, तर दाबोळीत सर्वांत कमी २,४४०.१ मिमी पावसाची नोंद केली आहे. दाबोळी वगळता सर्व केंद्रांवर पावसाने इंचांचे शतक पूर्ण केले आहे. उत्तर गोव्यात ३,३०१ मिमी म्हणजेच १२९.९६ इंच तर दक्षिण गोव्यात ३,१०८.१ मिमी म्हणजेच १२२.३६ इंच पावसाची नोंद केली आहे.

आजही जोरदार बरसणार

कोकण किनारपट्टीत कमी दाबाचा पट्टा सक्रिय आहे, तसेच पश्‍चिम बंगाल येथे चक्रीय वारे वाहत आहे. राज्यात रविवारीही वादळी वाऱ्यासह जोरदार पावसाची शक्यता असल्याने गोवा वेधशाळेने ऑरेंज अलर्ट जारी केला अाहे.