Old Goa : गोवा पुन्हा हादरला! कांदोळीनंतर चोडणमध्ये पित्यानेच केला मुलीचा खून

Old Goa : काही दिवसांपूर्वी कांदोळी येथे एका पित्याने पोटच्या दोन मुलांचा गळा आवळून खून करत स्वत: गळफास घेत आत्महत्या केल्याचा दुर्देवी प्रकार समोर आला होता. असाच एक धक्कादायक प्रकार जुने गोवे येथील चोडणमध्ये उघडकीस आला आहे. चोडणमध्ये मानसीच्या परिसरात एका 12 वर्षीय मुलीचा मृतदेह आढळून आला आहे. अल्पवयीन मुलीच्या हत्येप्रकरणी तिच्या वडिलांना जुने गोवे पोलिसांनी अटक केली आहे.

जुने गोवे येथील चोडणमध्ये एक धक्कादायक प्रकार उघडकीस आला आहे. चोडणमध्ये मानसी परिसरात हा प्रकार संध्याकाळी उघडकीस आला होता. मानसी परिसरात एका 12 वर्षीय मुलीचा मृतदेह आढळून आला होता. मृत मुलगी गेल्या तीन दिवसांपासून बेपत्ता होती. याप्रकरणाचा तपास जुने गोवे पोलिसांकडून सुरु होता. अवघ्या काही तासांतच जुने गोवे पोलिसांनी या प्रकरणाचा छडा लावत संशयित आरोपीस अटक केली आहे. 12 वर्षीय मुलीचा तिच्या पित्यानेच खून केल्याची धक्कादायक माहिती समोर आली आहे. मोहम्मद सलीम (34) असे संशयित आरोपीचे नाव आहे. याप्रकरणी जुने गोवे पोलिसांनी तिच्या पित्यालाच अटक केली आहे.

कांदोळी येथे एका पित्याने पोटच्या दोन मुलांचा गळा आवळून खून करत स्वत: गळफास घेत आत्महत्या केल्याचा प्रकार समोर आला होता. ओर्डा-कांदोळी येथे शनिवारी रात्री उशिरा याबाबतची माहिती उघडकीस आली होती. या हत्‍याकांडामुळे संपूर्ण गोवा हादरून गेला होता. जॉय फर्नांडिस असे हत्या केलेल्या बापाचे नाव आहे. तर मुलगी अनानिया (13) आणि मुलगा जोसेफ (8) अशी मुलांची नावे आहेत. जॉय फर्नांडिस हा गेल्या 8 वर्षांपासून बेरोजगार होता तसेच जॉय व त्याचा पत्नीमध्ये कौंटुबिक वाद होत होते अशी जबानी जॉय फर्नांडिस याच्या पत्नीने पोलिसांना दिली होती.