Ranji Trophy 2025: तेंडुलकर-वासुकीला विकेट, तरी सौराष्ट्राच्या फलंदाजांचे गोव्यावर वर्चस्व; पहिल्या दिवशी भक्कम धावसंख्या

पणजी: मध्य फळीतील अर्पित वसावडा (८८), प्रेरक मांकड (नाबाद ८८), जय गोहिल (६८) यांच्या दमदार अर्धशतकांमुळे रणजी करंडक क्रिकेट स्पर्धेच्या एलिट ब गट लढतीत सौराष्ट्राने गोव्यावर पहिल्या दिवशी वर्चस्व राखले. राजकोट येथे रविवारपासून सुरू झालेल्या या चार दिवसीय लढतीच्या पहिल्या दिवसअखेर यजमान संघाने ४ बाद ३१७ धावा अशी भक्कम वाटचाल केली.

सौराष्ट्राने नाणेफेक जिंकून प्रथम फलंदाजी स्वीकारली. चिराग जानी (१८) याला वासुकी कौशिक याने लवकर पायचीत बाद केले. हा अपवाद सौराष्ट्राच्या फलंदाजांना गोव्याचे गोलंदाज भारी ठरू शकले नाहीत. सलामीच्या हार्विक देसाई (४५) याचे अर्धशतक पाच धावांनी हुकले. अर्जुन तेंडुलकरने त्याला त्रिफळाचीत बाद केले.

नंतर जय व अर्पित यांनी तिसऱ्या विकेटसाठी ७५ धावांची भागीदारी केल्यामुळे सौराष्ट्राला मजबूत धावसंख्येच्या दिशेने कूच करता आली. दर्शन मिसाळच्या गोलंदाजीवर राजशेखर हरिकांतने जय याला यष्टीचीत बाद केल्यानंतर अर्पित-प्रेरक जोडी गोव्यासाठी डोकेदुखी ठरली.

अर्पितने मोहित रेडकरच्या गोलंदाजीवर गोव्याचा कर्णधार स्नेहल कवठणकरच्या हाती झेल दिल्यामुळे चौथ्या विकेटची ९७ धावांची भागीदारी संपुष्टात आली. प्रेरकला दिवसअखेर सम्मर गज्जर याने चांगली साथ दिली. त्यांनी पाचव्या विकेटसाठी ६२ धावांची अभेद्य भागीदारी केली. या लढतीसाठी गोव्याने मध्य प्रदेशविरुद्ध पराभूत झालेला संघच कायम ठेवला. राजकोटची खेळपट्टी फलंदाजांना साथ देते हा लौकिक रविवारी पुन्हा दिसला.

संक्षिप्त धावफलक

सौराष्ट्र, पहिला डाव ः ९० षटकांत ४ बाद ३१७ (हार्विक देसाई ४५, चिराग जानी १८, जय गोहिल ६८, अर्पित वसावडा ८१, प्रेरक मांकड नाबाद ८८, सम्मर गज्जर नाबाद १२, अर्जुन तेंडुलकर १९-१-९२-१, वासुकी कौशिक २१-८-३७-१, दीपराज गावकर १-०-३-०, दर्शन मिसाळ २२-१-७७-१, मोहित रेडकर १४-१-५६-१, ललित यादव १२-२-४७-०, अभिनव तेजराणा १-०-५-०).