Goa Ranji Team: गोवा क्रिकेट संघात मोठे बदल! साखळी लढतीत खेळलेल्या सहा जणांना डच्चू; 'या' चौघांचा समावेश

पणजी: रणजी करंडक क्रिकेट प्लेट विभागीय अंतिम लढतीसाठी गोवा क्रिकेट असोसिएशनच्या सीनियर निवड समितीने संघात मोठे बदल केले. अरुणाचल प्रदेशविरुद्ध अखेरच्या साखळी लढतीत खेळलेल्या १८ सदस्यीय संघातील सहाजणांना वगळण्यात आले, तर चौघांना आता १६ सदस्यीय संघात सामावून घेण्यात आले आहे.

गोव्याचा पाच दिवसीय रणजी प्लेट अंतिम सामना २३ जानेवारीपासून सोविमा येथे नागालँडविरुद्ध खेळला जाईल. या दोन्ही संघांनी २०२५-२६ मोसमातील रणजी करंडक एलिट श्रेणीसाठी पात्रता मिळविली आहे.

प्राप्त माहितीनुसार, शनिवारी या महत्त्वपूर्ण लढतीसाठी गोव्याचा १६ सदस्यीय संघ निवडण्यात आला. त्यात डावखुरा फिरकीपटू अमूल्य पांड्रेकर, वेगवान गोलंदाज फेलिक्स आलेमाव व विजेश प्रभुदेसाई यांनी पुनरागमन केले, तर अष्टपैलू विकास सिंग रणजी क्रिकेट न खेळलेला नवा चेहरा आहे. या चौघांनीही रणजी प्लेट साखळी फेरीनंतर झालेल्या टी-२० व एकदिवसीय स्पर्धेत शानदार कामगिरी केली होती.

अरुणाचल प्रदेशविरुद्ध अखेरच्या साखळी लढतीसाठी निवडलेल्या १८ सदस्यीय संघातील लक्षय गर्ग, कीथ पिंटो, शुभम तारी, राहुल मेहता, मंथन खुटकर व ऋत्विक नाईक या सहाजणांना वगळण्यात आले आहे. यापैकी लक्षय व कीथ अरुणाचल प्रदेशविरुद्धच्या अकरा सदस्यीय संघात होते.