IPL 2026 Auction: गोव्याचे क्रिकेटपटू 'आयपीएल' लिलावात पसंतीविना; सुयश प्रभुदेसाई, अभिनव तेजराणा व आणि ललित यादव Unsold

पणजी: आयपीएल क्रिकेट स्पर्धेचा मिनी लिलाव मंगळवारी अबुधाबी येथे झाला. देश-विदेशातील मिळून साडेतीनशे खेळाडू लिलावात होते. त्यात तिघेजण गोव्याच्या संघातील होते; पण त्यांना कोणत्याही फ्रँचायजीने पसंती दिली नाही, साहजिकच ते अनसोल्ड राहिले.

लिलालासाठी सुयश प्रभुदेसाई, अभिनव तेजराणा व पाहुणा खेळाडू ललित यादव या गोव्याच्या तिघा खेळाडूंची नोंदणी झाली होती. त्यापैकी अभिनव तेजराणा याचे नाव लिलावाच्या पहिल्या फेरीत पुकारले गेले; पण त्याच्यासाठी कोणत्याही संघाने बोली लावली नाही. सुयश प्रभुदेसाई व ललित यादव यांचे नाव लिलाव प्रक्रियेत अखेरपर्यंत आलेच नाही.

सुयश प्रभुदेसाई २०२२ ते २०२४ या कालावधीत रॉयल चॅलेंजर्स बंगळूरतर्फे आयपीएल सामने खेळला होता. २०२५ मध्ये गोव्याचा एकही क्रिकेटपटू आयपीएल स्पर्धेत नव्हता. आता २०२६ मध्येही गोव्याच्या संघातील खेळाडू आयपीएलमध्ये नसतील ही बाब मंगळवारच्या मिनी लिलावानंतर स्पष्ट झाली.