I League: स्पोर्टिंग क्लबने उघडले खाते! चौथ्या स्थानी झेप, मणिपूर क्लासावर 1-0 फरकाने विजय

I League Sporting Club Vs Manipur Klasa FC

पणजी: स्पोर्टिंग क्लब द गोवा संघाने आय-लीग २ फुटबॉल स्पर्धेतील मोहिमेतील पहिला विजय मंगळवारी नोंदविला. त्यांनी मंगळवारी बांबोळी येथील ॲथलेटिक्स स्टेडियमवर मणिपूरच्या क्लासा एफसीवर १-० फरकाने विजय नोंदविला.

मागील दोन लढतीतून फक्त एकाच गुणाची कमाई केलेल्या स्पोर्टिंग क्लब द गोवाला"विजयामुळे पूर्ण तीन गुण मिळाले व ते आता तीन लढतीतून चार गुणांसह चौथ्या क्रमांकावर आले आहेत. क्लासा एफसीला तिसरा पराभव पत्करावा लागला. चार लढतीतून फक्त एका गुणासह ते नऊ संघांत आठव्या स्थानी आहेत.

स्पोर्टिंग क्लब द गोवास विजयाचे पूर्ण तीन गुण मिळवून देणारा गोल सामन्याच्या दहाव्या मिनिटास बिस्व दारजी याने दहाव्या मिनिटास भेदक हेडरद्वारे नोंदविला. स्पोर्टिंग गोवाचा स्पर्धेतील पुढील सामना १५ फेब्रुवारीस पश्चिम बंगालमधील कल्याणी येथे युनायटेड स्पोर्टस क्लबविरुद्ध होईल.

स्पर्धेत १० गुणांसह अग्रस्थान कायम राखताना मंगळवारी ऐजॉल-मिझोरामच्या चानमारी एफसीने मणिपूरच्या ट्राऊ एफसीचा ७-१ फरकाने धुव्वा उडविला. चानमारी एफसीचा हा चार सामन्यांतील तिसरा विजय ठरला.