Ranji Trophy 2025: रजत पाटीदारला रोखण्यासाठी 'मास्टरप्लॅन'! गोवा संघात खास गोलंदाजाची एन्ट्री, फलंदाजाची धाकधूक वाढली

पणजी: रणजी करंडक क्रिकेट एलिट ब विभागीय स्पर्धेतील अगोदरच्या तीन सामन्यात संघात नसलेला डावखुरा फिरकी गोलंदाज अमूल्य पांड्रेकर याला पुनरागमनाची संधी लाभली आहे. मध्य प्रदेशविरुद्ध शनिवारपासून (ता. ८) पर्वरी येथील जीसीए अकादमी मैदानावर होणाऱ्या लढतीसाठी गोवा क्रिकेट असोसिएशनने (जीसीए) गुरुवारी सोळा सदस्यीय संघ जाहीर केला. त्यात सलामीचा ईशान गडेकर व मध्य फळीतील कश्यप बखले या फलंदाजांना स्थान मिळाले नाही.

रणजी करंडकाच्या एलिट ब गटात प्रत्येकी तीन सामन्यानंतर गोवा ११ गुणांसह अव्वल स्थानी आहे, तर तिन्ही सामने अनिर्णित राहिलेल्या मध्य प्रदेशचे नऊ गुण आहेत.

पाहुणा संघ गोव्यात दाखल झाला असून आयपीएल विजेत्या रॉयल चॅलेंजर्स बंगळूरचा (आरसीबी) कर्णधार कसोटीपटू खेळाडू रजत पाटीदार गोव्याविरुद्ध मध्य प्रदेशचे नेतृत्व करणार आहे. ते पूर्ण ताकदीनिशी गोव्यात आले आहेत. दक्षिण आफ्रिका अ विरुद्ध भारत अ संघात स्थान न मिळाल्याने रजत मध्य प्रदेश संघात दाखल झाला आहे.

गोव्याच्या संघात पुन्हा स्थान मिळालेला २९ वर्षीय अमूल्य २९ रणजी सामने खेळला असून त्याने ५३ गडी बाद केले आहेत. जानेवारी २०२५ मध्ये नागालँडविरुद्ध सोविमा येथे तो रणजी करंडक प्लेट विभागीय अंतिम लढत खेळला होता, मात्र यंदा सुरवातीच्या तीन सामन्यांसाठी त्याला संघात स्थान मिळाले नव्हते.

कर्नाटक व पंजाबविरुद्धच्या लढतीसाठी निवडलेल्या १७ सदस्यीय संघातील कश्यप याला चंडीगडविरुद्ध पर्वरी येथील पहिल्या सामन्यात संधी मिळाली होती, पण तो शून्यावर बाद झाला. डावखुरा सलामी फलंदाज मंथन खुटकर याने दोन चमकदार अर्धशतकांसह छाप पाडल्यामुळे ईशानला आता संघाबाहेर जावे लागले आहे.

गोव्याचा संघ

मंथन खुटकर, सुयश प्रभुदेसाई, दीपराज गावकर, दर्शन मिसाळ, स्नेहल कवठणकर (कर्णधार), मोहित रेडकर, समर दुभाषी, हेरंब परब, अभिनव तेजराणा, अर्जुन तेंडुलकर, ललित यादव (उपकर्णधार), अमूल्य पांड्रेकर, राजशेखर हरिकांत, वासुकी कौशिक, विजेश प्रभुदेसाई, विकास सिंग.

मध्य प्रदेशचा संघ

रजत पाटीदार (कर्णधार), शुभम शर्मा, यश दुबे, हर्ष गवळी, हिमांशू मंत्री, व्यंकटेश अय्यर, हरप्रीत सिंग, सारांश जैन, सागर सोळंकी, कुमार कार्तिकेय, अधीर प्रताप सिंग, कुलदीप सेन, अर्शद खान, अनुभव अगरवाल, आर्यन पांडे.