पणजी: गोवा क्रिकेट असोसिएशनच्या (जीसीए) निवडणुकीसाठी निवडणूक अधिकाऱ्याने पात्र १०७ क्लब मतदार यादी जाहीर केली असून या क्लबांच्या हाती सहा पदांसाठी दावेदार एकूण १३ उमेदवारांचे भवितव्य आहे. मंगळवारी (ता. १६) होणाऱ्या व्यवस्थापकीय समिती निवडणुकीकडे राज्य क्रिकेटचे लक्ष असेल.
१०७ पैकी चार क्लबतर्फे मतदार कोण याची स्पष्टता नव्हता, आता नव्या मतदार यादीनुसार प्रकरण निकालात निघाले आहे. मतदार यादीनुसार, विजय चौगुले आर्लेम स्पोर्टस क्लबतर्फे, मारुतीराव मोटणकर चौगुले स्पोर्टस क्लबतर्फे, डी. व्ही. साळगावकर ला पाझ गार्डन क्रिकेट क्लबतर्फे, तर प्रदीप म्हांब्रे साळगावकर क्रिकेट क्लबतर्फे मतदार असतील.
अगोदर, आर्लेम व चौगुले क्लबतर्फे विजय चौगुले यांचे, तर ला पाझ गार्डन व साळगावकर क्लबतर्फे डी. व्ही. साळगावकर यांचे मतदार म्हणून नाव आले होते. निवडणूक अधिकारी ए. के. जोती यांनी एक व्यक्ती, एक मत हे धोरण अंमलात आणल्यामुळे या चारही क्लबबाबतचा निर्णय प्रलंबित राहिला होता.
याशिवाय अन्य क्लबनी आपले मतदार बदलले असून त्यांनाही मान्यता मिळाली आहे. आता धेंपो क्रिकेट क्लबतर्फे अनंत कामत, तर गोवा स्पोर्टस अकादमीतर्फे वल्लभ प्रभू मतदान प्रक्रियेत भाग घेतील. गोवा सरकारमधील मंत्री दिगंबर कामत हे स्पार्कलिंग स्टार्स असोसिएशनतर्फे, तर मंत्री नीळकंठ हळर्णकर साकुरा क्रिकेट क्लबतर्फे मतदानाचा हक्क बजावतील.
सहापैकी पाच जागांसाठी चेतन देसाई-विनोद (बाळू) फडके गट व रोहन गावस देसाई यांचे समर्थन असलेला ‘जीसीए परिवर्तन’ गट यांच्यात थेट दुहेरी लढत होत आहे. चेतन-बाळू गटाला अकबर मुल्ला व सूरज लोटलीकर यांचा पाठिंबा मिळालेला असल्याने उत्सुकता वाढली आहे. प्रत्येक मतदार क्लब मतदानास यावा यासाठी दोन्ही गटाकडून शर्थीचे प्रयत्न सुरू असून सोमवारी मोर्चेबांधणीसाठी उमेदवारांना अखेरची संधी असेल. माजी सभापती राजेश पाटणेकर उपाध्यक्षपदाच्या रिंगणात असल्याने या पदाचे महत्त्व वाढले आहे.
गोवा क्रिकेट असोसिएशनच्या प्रशासनाची धुरा माजी रणजीपटूंच्या हाती येईल का, त्यांना मतदार क्लबकडून कौल मिळणार का या प्रश्नांचे उत्तरही मंगळवारी संध्याकाळी मतमोजणीनंतर मिळेल. माजी रणजी फलंदाज महेश देसाई (चेतन-बाळू गट) अध्यक्षपदाची, तर माजी रणजी अष्टपैलू, उपकर्णधार हेमंत पै आंगले सचिवपदाची निवडणूक लढवत आहेत. तटस्थ असलेले हेमंत यांच्यामुळे सचिवपदाची निवडणूक तिरंगी ठरली आहे. ते एकहाती खिंड लढवत आहेत. संयुक्त सचिवपदाचे उमेदवार अनंत नाईक (चेतन-बाळू गट) राष्ट्रीय शालेय, विद्यापीठ पातळीवर क्रिकेट खेळले आहेत.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
