Cooch Behar Trophy: गोव्याच्या फलंदाजांची घसरगुंडी! पंजाबकडून डावाने पराभवाच्या उंबरठ्यावर

Cooch Behar Trophy Goa Vs Punjab Cricket Match

पणजी: कुचबिहार करंडक १९ वर्षांखालील क्रिकेट सामन्यात पंजाबने पहिल्या डावात ३६० धावांची आघाडी घेतल्यानंतर पर्वरी येथील जीसीए क्रिकेट अकादमी मैदानावर सामन्याच्या दुसऱ्या दिवसअखेर शनिवारी गोव्याचा दुसरा डाव ५ बाद ७४ असा गडगडला. अजूनही ते २८६ धावांनी मागे असून डावाने पराभव निश्चित आहे.

पंजाबच्या फलंदाजांनी गोव्याच्या गोलंदाजांना साफ निष्प्रभ केले. देव अमृतपाल सिंग (२००, २२८ चेंडू, २४ चौकार, ४ षटकार) याचे नाबाद द्विशतक, तसेच राहुल कुमार (११७, ८४ चेंडू, १० चौकार, ९ षटकार) याचे आक्रमक शतक यामुळे पंजाबने पहिला डाव ५ बाद ४७० धावांवर घोषित केला. त्यांच्या रेवनप्रीत सिंग (७७, ९३ चेंडू, ७ चौकार, ३ षटकार) यानेही अर्धशतक केले.

संक्षिप्त धावफलक

गोवा, पहिला डाव ः ११० व दुसरा डाव ः ३९ षटकांत ५ बाद ७४ (शंतनू नेवगी १२, विराज नाईक १२, चिगुरुपती व्यंकट ६, दिशांक मिस्कीन १२, यश कसवणकर नाबाद २६, निसर्ग नागवेकर ४, द्रिश नार्वेकर नाबाद ०, शुभम राणा २-२०).

पंजाब, पहिला डाव (३ बाद १३९ वरून) ः ८२.२ षटकांत ५ बाद ४७० घोषित (देव अमृतपाल सिंग नाबाद २००, राहुल कुमार ११७, रेवनप्रीत सिंग ७७, प्रभजीत सिंग नाबाद २९, पुंडलिक नाईक १६-२-७४-१, ग्रंथिक बुयाव १७-०-७५-२, यश कसवणकर २२-०-१२८-१, अनुज यादव १५-०-७७-१, द्विज पालयेकर ९.२-०-६२-०, दिशांक मिस्कीन ३-०-४२-०).