C K Nayudu Trophy: गोव्याविरुद्ध उत्तर प्रदेशचा धावांचा डोंगर! सामना रंगतदार अवस्थेत

C K Nayudu U23 Cricket Trophy 2024 Goa Vs Uttar Pradesh

पणजी: कर्नल सी. के. नायडू करंडक २३ वर्षांखालील क्रिकेट सामन्यात कर्णधार आराध्य यादव याच्या त्रिशतकाच्या बळावर उत्तर प्रदेशने धावपर्वत उभारला. त्यांनी सामन्याच्या दुसऱ्या दिवशी शनिवारी पहिला डाव ६ बाद ५८७ धावांवर घोषित केला.

कानपूर येथील ग्रीन पार्क स्टेडियमवर सुरू असलेल्या या ब गट सामन्याच्या दुसऱ्या अखेर गोव्याने पहिल्या डावात १ बाद ८२ धावा केल्या होत्या.

सामन्याचा दुसरा दिवस उत्तर प्रदेशच्या आराध्य याने गाजविला. त्याने अगोदरच्या दिवशीच्या १५८ धावांवरून शनिवारी ३२० धावांनी शानदार खेळी केली. या दरम्यान त्याने ४१२ चेंडूंचा सामना करताना ३८ चौकार व एक षटकार मारला.

त्याने दोन मोठ्या भागीदारीही रचल्या. शोएब सिद्दिकी (१००) याच्यासमवेत पाचव्या विकेटसाठी २४६ धावांची, तर प्रशांत वीर (नाबाद १००) याच्यासह सहाव्या विकेटसाठी २४९ धावांची भागीदारी केली.

संक्षिप्त धावफलक

उत्तर प्रदेश, पहिला डाव (४ बाद ३१५ वरून) ः १२८.४ षटकांत ६ बाद ५८७ घोषित (आराध्य यादव ३२०, शोएब सिद्दिकी १००, प्रशांत वीर नाबाद १००, लखमेश पावणे ३०.४-१-११२-२, शिवम प्रताप सिंग २५-२-१०६-३, शदाब खान २३-२-८७-१, सनिकेत पालकर १३-०-५९-०, दीप कसवणकर १८-०-१११-०, आर्यन नार्वेकर ५-०-४४-०, अझान थोटा १४-०-६१-०).

गोवा, पहिला डाव ः २० षटकांत १ बाद ८२ (अझान थोटा नाबाद ३९, देवनकुमार चित्तेम १३, कौशल हट्टंगडी नाबाद २०, कुणाल त्यागी १-३३).