Chhaava Advance Booking: 'छावा'च्या प्रदर्शनाला चार दिवस बाकी, ऑनलाईन तिकीट विक्रीला सुरुवात; किंमत किती?

Chhaava Movie Release: छत्रपती संभाजी महाराज यांच्या जीवनावर आधारित छावा हा चित्रपट १४ फेब्रुवारच्या दिवशी प्रदर्शित होणार आहे. विकी कौशल हा हिंदी सिनेमातील रांगडा अभिनेता या चित्रपटात छत्रपती संभाजी महाराजांच्या भूमिकेत दिसेल तर दक्षिणेतून सिनेसृष्टीमधे पदार्पण केलेली रश्मिका मंदाना हिने या चित्रपटामध्ये महाराणी येसूबाई यांची भूमिका साकारली आहे. विकी आणि रश्मिका यांच्याव्यतिरिक्त अक्षय खन्ना देखील प्रमुख भूमिकेत आहे, तो चित्रपटात बादशाह औरंगजेबाची भूमिका निभावताना पाहायला मिळेल.

ऑनलाईन विक्री सुरु:

मराठी माणसाच्या मनात छावा या चित्रपटाची उत्सुकता आहेच. महाराजांचा जीवनप्रवास मोठ्या पडद्यावर पाहण्यासाठी प्रेक्षकांची उत्कंठा लागून राहिली आहे. सध्या आगामी चित्रपटाचे ऑनलाईन बुकिंग सुरु झाले असून बुक माय शो सारख्या प्लॅटफॉर्म्सवर चित्रपटाची तिकिटं ३०० ते ३५० रुपयांना विकली जातायत.

सकाळी सकाळी चित्रपट पाहायला जाणं स्वस्त असतं असं म्हणतात पण या चित्रपटाच्या बाबतीत तसं वाटत नाही. छावा सिनेमाच्या सकाळी लागणाऱ्या शोचं तिकीट देखील २०० ते ४०० रुपये किंमतीच्या रेंजमध्ये आहे. PVR,INOX यांसारख्या बड्या स्क्रीन्सवर तर चित्रपटाच्या तिकिटांची किंमत ४५० ते ५०० पर्यंत जाऊन पोहोचली आहे .

Imax मध्ये दिसणार 'छावा':

चित्रपट प्रेमींसाठी बड्या स्क्रीन्सवर चित्रपट पाहणं म्हणजे पर्वणी असते आणि छावाच्या निर्मात्यांनी चित्रपट प्रसिद्ध होण्यापूर्वीच चाहत्यांना सुखद धक्का दिलाय. छावाच्या चाहत्यांना हा चित्रपट Imax मध्ये पाहायला मिळणार आहे, मात्र यासाठी ६०० ते ७०० रुपयांपर्यंत किंमत मोजावी लागेल लक्ष्मण उतेकर यांनी दिग्दर्शित केलेला छावा बॉक्स ऑफिसवर किती धुमाकुळ घालतो हे पाहणं रंजक ठरेल.