मडगाव: भाजप व काँग्रेस या दोन्ही पक्षांनी यावेळी आपल्या पक्षाला पूर्ण बहुमत मिळणार, असा दावा केला असला तरी प्रत्यक्षात गोव्यात त्रिशंकू विधानसभाच अस्तित्वात येण्याची शक्यता व्यक्त केली जात आहे. या परिस्थितीत निकाल लागण्यापूर्वीच संभाव्य आमदारांच्या घोडेबाजाराला ऊत येण्याची शक्यता व्यक्त केली जात आहे. (Goa Election News)
यावेळी गोव्यात भाजप (BJP) किंवा काँग्रेस पक्ष 16 जागांवरच थांबण्याची शक्यता असून लहान पक्ष आणि अपक्ष आमदारांचा आकडा वाढण्याची शक्यता आहे. त्याच पार्श्वभूमीवर काही संभाव्य आमदारांना आपल्याकडे ओढण्यासाठी लॉबिंग सुरू झाले आहे, अशी माहिती मिळाली आहे. आतापर्यंत सावित्री कवळेकर, इजिदोर फर्नांडिस, विजय पै खोत, दीपक पाऊसकर आदींशी भाजप व काँग्रेस (Congress) या दोन्ही पक्षांनी संधान साधले आहे.
भाजपकडून इन्कार
भाजप प्रदेशाध्यक्ष सदानंद शेट तानावडे यांनी हे आरोप फेटाळले. आमच्यावर दुसऱ्या पक्षाच्या आमदारांचा पाठिंबा घेण्याची वेळच येणार नाही. विरोधकांच्या आरोपात तथ्य नसल्याचा दावाही त्यांनी यावेळी केला.
‘राष्ट्रवादी’शीही संधान
चोडणकर यांनी या वृत्ताला दुजोरा दिला. आमच्या काही उमेदवारांशी भाजप नेत्यांनी संपर्क साधण्याचा प्रयत्न केला. मात्र, आम्ही आवाज उठविल्यावर हे प्रयत्न बंद झाले असे ते म्हणाले. राष्ट्रवादीच्या उमेदवारांशीही संपर्क साधण्याचा प्रयत्न केला, अशी माहिती जुझे फिलीप डिसोझा यांनी दिली.
मुख्यमंत्रिपदाची स्वप्ने
मुख्यमंत्री डॉ. प्रमोद सावंत यांच्यासह विश्वजीत राणे आणि माविन गुदिन्हो यांच्याकडून हे प्रयत्न सुरू आहेत. या तिघांनाही ‘आपणच पुढचा मुख्यमंत्री’ अशी स्वप्ने पडू लागली आहेत. त्यामुळेच ते आमदार (MLA) फोडण्यासाठी सक्रिय झाले आहेत, असा आरोप चोडणकर यांनी केला आहे. आमच्या उमेदवारांनी त्यांना दाद दिलेली नाही.
दैनिक गोमंतकचे सदस्य व्हा
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
