आलेमाव भगिनींवर पैसे वाटपाचा आरोप, नावेलीत तणाव

मडगाव : तृणमूल काँग्रेसच्या नावेलीच्या उमेदवार वालंका आलेमाव यांच्या बहिणींवर पैसे वाटपाचा आरोप करण्यात आला आहे. वालांका यांच्या दोन बहिणी मतदारांना आमिष दाखविण्यासाठी पैसे वाटत असल्याचा आरोप झाल्यानंतर नावेलीत तणावाचं वातावरण निर्माण झालं आहे. अधिकाऱ्यांना घेराव घातल्यानंतर पोलीसही घटनास्थळी दाखल झाले आहेत. (Goa Election News Updates)

नावेलीत तृणमूल काँग्रेसच्या (TMC) उमेदवार वालांका आलेमाव यांच्या बहिणींनी पैसे वाटल्याचा आरोप प्रतिमा कुतिन्हो आणि दिग्विजित चव्हाण या उमेदवारांनी केला आहे. इतकंच नाही तर या उमेदवारांसह कार्यकर्त्यांनी अधिकार्‍यांना घेरावही घालता आहे. पोलिसांना घटनेची माहिती मिळताच तात्काळ ते घटनास्थळी दाखल झाले आहेत. आलेमाव बहिणींना बाहेर काढण्याची मागणी आंदोलकांनी केली आहे.

दरम्यान गोव्यात विधानसभेसाठी (Goa Assembly Elections) सकाळपासून शांततेत मतदान सुरु आहे. काही अपवाद वगळता कुठेही मतदानाला गालबोट लागलेलं नाही. ताळगावमध्ये इव्हीएम मशीन बंद पडल्याने मतदान संथगतीने सुरु होतं. त्यामुळे मतदारांनी (Voters) गोंधळ घातल्याची माहिती आहे. ताळगावात सकाळपासूनच मतदानासाठी गर्दी पाहायला मिळाली, त्यात मशीनमधील बिघाडामुळे लांबचलांब रांगा लागल्या होत्या.