USCIS Green Card Rule Clarification USA: अमेरिकेत नोकरी करण्याचे आणि तिथेच स्थायिक होण्याचे स्वप्न पाहणाऱ्या हजारो भारतीय तंत्रज्ञान (IT) प्रोफेशनल्ससाठी एक अत्यंत महत्त्वाची आणि दिलासादायक बातमी समोर आली. डोनाल्ड ट्रम्प प्रशासनाकडून ग्रीन कार्ड देण्याच्या प्रक्रियेचे नियम अधिक कडक करण्यात आल्यानंतर भारतीय स्थलांतरितांमध्ये चिंतेचे वातावरण निर्माण झाले होते.
नवीन नियमांनुसार, तात्पुरत्या व्हिसावर अमेरिकेत राहणाऱ्या परदेशी नागरिकांना कायमस्वरुपी वास्तव्यासाठी म्हणजेच ग्रीन कार्डसाठी आपल्या मायदेशी परत जाऊन तिथून अर्ज करावा लागू शकत होता. या जाचक नियमामुळे अमेरिकेत तंत्रज्ञान क्षेत्रात काम करणाऱ्या लाखो भारतीयांच्या नोकऱ्या, त्यांचे परिवार आणि एकूणच भविष्यावर अनिश्चिततेचे सावट पसरले होते. मात्र, या वाढत्या चिंतेच्या पार्श्वभूमीवर अमेरिकन नागरिकत्व आणि इमिग्रेशन सर्व्हिसेस (USCIS) ने एक मोठे आणि महत्त्वपूर्ण स्पष्टीकरण जारी करुन भारतीयांना मोठा दिलासा दिला.
यूएससीआईएस (USCIS) चे प्रवक्ते जेक कहलर यांनी स्पष्ट केले की, ज्या अर्जदारांचे काम अमेरिकेच्या अर्थव्यवस्थेला बळकट करते, आर्थिक फायदा पोहोचवते किंवा ज्यांचे काम अमेरिकेच्या राष्ट्रीय हितासाठी महत्त्वाचे आहे, असे परदेशी नागरिक अमेरिकेत राहूनच आपली ग्रीन कार्ड प्रक्रिया पुढे सुरु ठेवू शकतात. आर्थिक लाभ किंवा राष्ट्रीय महत्त्वाच्या प्रकरणांमध्ये अशा अर्जदारांना ही विशेष सूट दिली जाऊ शकते. मात्र, ज्या प्रकरणांमध्ये असे योगदान सिद्ध होणार नाही, अशा उर्वरित लोकांना त्यांच्या वैयक्तिक परिस्थितीच्या आधारावर परदेशातून (म्हणजेच त्यांच्या मूळ देशातून) अर्ज करण्यास सांगितले जाऊ शकते. अमेरिकन प्रशासनाच्या या नव्या भूमिकेमुळे भारतीय समुदायाने सुटकेचा श्वास सोडला.
अमेरिकेत 'एच-1बी' व्हिसा मिळवणाऱ्यांमध्ये भारतीय नागरिकांची संख्या सर्वाधिक आहे. एका अधिकृत आकडेवारीनुसार, आर्थिक वर्ष 2025 मध्ये मंजूर झालेल्या एकूण 4 लाखांहून अधिक एच-1बी व्हिसांपैकी जवळपास 2.83 लाख व्हिसा एकट्या भारतीयांना मिळाले होते. हे लोक गेल्या अनेक वर्षांपासून अमेरिकेत वास्तव्यास आहेत आणि ग्रीन कार्डच्या मोठ्या बॅकलॉगमुळे दीर्घकाळापासून प्रतीक्षा करत आहेत.
यापूर्वी, हे सर्वजण 'अॅडजस्टमेंट ऑफ स्टेटस' अंतर्गत अमेरिकेत राहूनच ग्रीन कार्डसाठी अर्ज करु शकत होते. आता नवीन नियमांनंतर जे भारतीय तंत्रज्ञ आपले आर्थिक योगदान सिद्ध करु शकतील, त्यांना तर मोठा दिलासा मिळेल, परंतु अद्याप या नियमांबाबत पूर्णपणे स्पष्ट मार्गदर्शक तत्त्वे जाहीर न झाल्यामुळे तंत्रज्ञान क्षेत्रात काहीशी संभ्रमावस्था अजूनही कायम आहे.
या सर्व घडामोडींच्या दरम्यान, प्रसिद्ध आयटी कंपनी 'जोहो' (Zoho) चे प्रमुख श्रीधर वेम्बू यांनी सोशल मीडियावरुन भारतीय प्रोफेशनल्सना आपल्या मायदेशी म्हणजेच भारतात परतण्याचे आवाहन केले, ज्यावर इंटरनेटवर उलटसुलट प्रतिक्रिया उमटत आहेत. अनेक भारतीय आयटी कर्मचाऱ्यांचे म्हणणे आहे की, अमेरिकेत (America) अनेक वर्षांची घेतलेली मेहनत आणि तिथे स्थायिक झालेल्या कुटुंबाला अचानक सोडून भारतात परतणे इतके सोपे नाही.
दुसरीकडे, मेटा आणि अॅमेझॉनसारख्या दिग्गज टेक कंपन्यांमध्ये सुरु असलेल्या मोठ्या नोकर कपातीमुळे एच-1बी व्हिसाधारक कर्मचाऱ्यांवर आधीच मानसिक दबाव वाढला आहे, कारण नोकरी गेल्यानंतर नवीन नोकरी शोधण्यासाठी त्यांच्याकडे केवळ 60 दिवसांचा अवधी असतो. अशा कठीण परिस्थितीत अमेरिकन प्रशासनाच्या ताज्या विधानाने आशेचा किरण नक्कीच दाखवला असला, तरी संपूर्ण चित्र स्पष्ट होण्यासाठी आणखी काही काळ वाट पाहावी लागेल.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.