Watch Video: संघ हरला म्हणून राग आला, चाहत्यांनी स्टेडियमच पेटवलं; क्षणात सगळं जळून खाक, आग लावणारे 15 वर्षांखालील मुलं

फुटबॉल खेळाडूंच्या जोशाइतकेच अनेकदा चाहतेही अविश्वसनीय उत्साह दाखवतात. मात्र हा उत्साह रागात बदलला तर त्याचे परिणाम किती भयावह होऊ शकतात, याची प्रचिती फिनलंडमध्ये आली. ७ डिसेंबर २०२५ रोजी फिनलंडमधील नामांकित क्लब एफसी हाकाचे होम ग्राउंड तेहतान केंटा (फॅक्टरी फील्ड) संतप्त चाहत्यांनी पेटवून दिले. क्लबला अव्वल विभाग वेइकौस्लिगा मधून घसरवण्यात आल्यानंतर ही धक्कादायक घटना घडली.

स्टेडियमला लागलेल्या आगीत मोठ्या प्रमाणावर हानी झाली. ४०० प्रेक्षक क्षमतेचा लाकडी स्टँड पूर्णतः जळून खाक झाला आणि फक्त छताचे बीम शिल्लक राहिले. जाहिरातींच्या पाट्या, कृत्रिम टर्फ तसेच मैदानाच्या इतर भागांचेही नुकसान झाले. सुदैवाने कोणतीही जीवितहानी झाली नाही. १९३० पासून एफसी हाकाचे घर असलेल्या या ऐतिहासिक मैदानावर झालेल्या या विनाशामुळे क्लबच्या वारशावर मोठा कलंक लागला असून फुटबॉलमधील जबाबदारी आणि शिस्तीवर प्रश्नचिन्ह निर्माण झाले आहे.

स्थानिक पोलिसांनी दिलेल्या माहितीनुसार आग लावणारे तिघेही चाहते १५ वर्षांखालील अल्पवयीन मुलं होती. ते घटनास्थळी उपस्थित होते आणि त्यांनीच हे कृत्य केल्याची पुष्टी झाली आहे. फिनिश कायद्यांतर्गत त्यांच्यावर फौजदारी गुन्हा दाखल करता येत नसला, तरी नुकसानभरपाईसाठी त्यांना जबाबदार धरले जाऊ शकते. फिनलंडमध्ये भरपाईसाठी कोणतीही किमान वयोमर्यादा नसल्यामुळे पुढील कारवाईचे दरवाजे खुले आहेत.

या घटनेमुळे क्लबची आर्थिक मोडतोड आणखी वाढण्याची शक्यता आहे. एकेकाळी फिनलंडमधील सर्वात मोठ्या आणि यशस्वी क्लबपैकी एक असलेल्या एफसी हाकाला आधीच मैदानावरील खराब कामगिरीचा फटका बसत आहे. सलग १५ सामने न जिंकण्याच्या अपयशामुळे त्यांना २०२६ हंगामासाठी य्कॉयलिगा या खालच्या विभागात ढकलण्यात आले आहे.

क्लबची घसरलेली कामगिरी, संतप्त चाहत्यांचा उद्रेक आणि त्यातून झालेले हे भीषण नुकसान या सर्व घटनांमुळे एफसी हाकासमोर आता पुनर्बांधणी आणि विश्वास परत मिळवण्याचे मोठे आव्हान उभे राहिले आहे. फुटबॉलमधील भावना किती अनियंत्रित होऊ शकतात आणि त्याचा परिणाम किती गंभीर असू शकतो, यावर या घटनेने पुन्हा एकदा प्रकाश टाकला आहे.