Honour Killing: डॉक्टर बहिणीची लहान भावानेच केली गोळ्या झाडून हत्या; थरकाप उडवणाऱ्या घटनेबाबत धक्कादायक खुलासा

Honour Killing In Pakistan: पाकिस्तानमधून पुन्हा एकदा एक धक्कादायक आणि हृदयद्रावक घटना समोर आली आहे. ‘ऑनर किलिंग’च्या नावाखाली एका महिला डॉक्टरची तिच्याच लहान भावाने गोळ्या झाडून हत्या केली. ही घटना पाकिस्तानच्या पंजाब प्रांतात घडली असून याप्रकरणी पोलिसांनी आरोपीला अटक केली. ही घटना गेल्या आठवड्यात लाहोरपासून सुमारे 200 किलोमीटर दूर असलेल्या टोबा टेक सिंह येथे घडली. या हत्येमुळे परिसरात एकच खळबळ उडाली.

पोलिसांनी (Police) दिलेल्या माहितीनुसार, डॉ. आयशा बीबी (24) ही नुकतीच किर्गिस्तानमधून एमबीबीएसचे शिक्षण पूर्ण करुन मायदेशी परतली होती. सुरुवातीला तिच्या वडिलांनी पोलिसांना सांगितले की, जेवण बनवण्यावरुन झालेल्या वादातून आयशाचा लहान भाऊ उमैर याने तिला गोळ्या घातल्या. पोलिसांनी याप्रकरणी उमैरला अटक केली, तेव्हा त्याने धक्कादायक खुलासा केला.

पोलिसांनी केलेल्या चौकशीत उमैरने बहिणीच्या हत्येची कबुली दिली. त्याने सांगितले की, आयशा किर्गिस्तानमध्येच एमबीबीएसची पदवी घेतलेल्या तिच्या आवडत्या डॉक्टर मुलासोबत लग्न करु इच्छित होती. तिच्या या निर्णयाला कुटुंबाचा तीव्र विरोध होता. परिवाराने तिला त्या मुलाशी कोणताही संपर्क न ठेवण्याचा इशारा दिला, परंतु तिने ऐकले नाही. उमैरने तिला आधी त्रास दिला आणि नंतर गोळ्या घालून तिची हत्या केली.

‘ऑनर किलिंग’चा भीषण वास्तव

पाकिस्तानमध्ये (Pakistan) दरवर्षी मोठ्या संख्येने ‘ऑनर किलिंग’च्या नावाखाली निष्पाप लोकांची हत्या केली जाते. यात सर्वाधिक शिकार महिला ठरतात. पाकिस्तानच्या मानवाधिकार आयोगाच्या (Human Rights Commission of Pakistan) आकडेवारीनुसार, दरवर्षी सुमारे एक हजार महिलांची 'ऑनर किलिंग’च्या नावाखाली हत्या केली जाते.

गेल्या वर्षीही लाहोरपासून सुमारे 375 किलोमीटर दूर असलेल्या मुझफ्फरनगर जिल्ह्यात एका व्यक्तीने आपल्या बहिणीची आणि तिच्या प्रियकराची कुऱ्हाडीने हत्या केली होती. तसेच, अलीकडेच बलुचिस्तान प्रांतातही एक तरुण आणि तरुणीची निर्दयीपणे हत्या करण्यात आली होती, ज्याचा व्हिडिओ सोशल मीडियावर व्हायरल झाल्यानंतर पोलिसांनी 14 लोकांना अटक केली होती.