Pakistan Political Crisis: इम्रान खान यांच्या अटकेवरुन उडाला भडका, रावळपिंडीतील लष्करी मुख्यालयात जमावाची जाळपोळ!

Imran Khan Arrest: पाकिस्तानचे माजी पंतप्रधान आणि पाकिस्तान तेहरीक-ए-इन्साफ (PTI) चे अध्यक्ष इम्रान खान यांच्या अटकेनंतर पाकिस्तानातील परिस्थिती चिघळली आहे.

पाकिस्तान तेहरीक-ए-इन्साफ (PTI) चे समर्थक रस्त्यावर उतरले आहेत. पक्षातील अनेक बड्या नेत्यांनी समर्थकांना रस्त्यावर येण्याचे आवाहन केले, त्यानंतर पीटीआय समर्थक ठिकठिकाणी गोंधळ, तोडफोड आणि जाळपोळ करत आहेत.

दरम्यान, रावळपिंडीतील लष्कराच्या मुख्यालयात जमाव घुसला तेव्हा हद्द झाली. एवढेच नाही तर लष्कराच्या कॉर्प्स कमांडरच्या निवासस्थानाचीही जमावाने तोडफोड केली.

इस्लामाबादमधील (Islamabad) परिस्थिती अत्यंत तणावपूर्ण आहे, कार्यकर्त्यांनी मुख्य रस्ता रोखून धरल्याने परिस्थीती अधिकच बिकट झाली आहे.

दुसरीकडे, इम्रान खान यांना पाकिस्तानी रेंजर्संनी अटक केल्यानंतर त्यांच्या पक्षाच्या कार्यकर्त्यांनी इस्लामाबादमध्ये निदर्शने करत गोंधळ घातला.

यानंतर इस्लामाबाद पोलिसांनी शहरात प्रतिबंधात्मक आदेश लागू केला. भ्रष्टाचाराच्या एका खटल्याच्या सुनावणीसाठी इम्रान खान इस्लामाबाद उच्च न्यायालयात उपस्थित असताना रेंजर्संनी त्यांना अटक केली.

हिंसाचाराच्या भीतीने इस्लामाबादमध्ये कलम 144 लागू करण्यात आले आहे

इम्रान खान यांच्या अटकेनंतर पाकिस्तानात (Pakistan) हिंसाचार सुरु झाला आहे. इम्रान यांच्या पक्षाच्या कार्यकर्त्यांनी तोडफोड, जाळपोळ सुरु केली.

हिंसाचाराची भीती लक्षात घेऊन इस्लामाबादमध्ये कलम 144 लागू करण्यात आले. इस्लामाबादशिवाय पाकिस्तानच्या अनेक भागात निदर्शने सुरु झाली आहेत.