Pakistan Flood: पाकिस्तानमध्ये पावसाचे थैमान! पुरामुळे 72 जणांचा मृत्यू; महामार्गही बंद होण्याची शक्यता

इस्लामाबाद: पाकिस्तानमध्ये दहा दिवसांपासून सुरू असलेल्या मुसळधार पावसामुळे आणि अचानक आलेल्या पुरामुळे किमान ७२ जणांचा मृत्यू झाला आहे. राष्ट्रीय आपत्ती व्यवस्थापन प्राधिकरणाने ही माहिती सोमवारी दिली.

वायव्य खैबर पख्तुनख्वा, पूर्व पंजाब, दक्षिण सिंध आणि नैऋत्य बलुचिस्तान प्रांत या भागांत जून २६ पासून पावसामुळे ७२ जणांचा मृत्यू झाला आहे. येथे अजून अजून पाऊस पडणार असून पूर येण्याची शक्यता आहे. महामार्गही बंद होऊ शकतात. यामुळे स्थानिकांनी घरातच थांबावे आणि पर्यटकांनी या भागांना भेट देऊ नये, असा इशारा दिला आहे.

गेल्या महिन्यांत वायव्येकडील स्वात नदीत एकाच कुटुंबातील १७ पर्यटक वाहून गेले होते. त्यातील चार जणांना वाचविण्यात आले आणि इतर १३ जणांचे मृतदेह नंतर सापडले. तेव्हापासून आपत्कालीन सेवा कमालीची दक्ष आहे.

गिलगिट-बाल्टिस्तान आणि दक्षिण सिंधमध्ये स्थानिक प्रशासनाला आपत्कालीन यंत्रणा त्वरित सक्रिय करण्याचे आदेश देण्यात आले आहेत. पर्यटक व नागरिकांना डोंगराळ भाग, नद्यांचे किनारे टाळण्याचा इशारा देण्यात आला आहे.

पंजाब आणि खैबर पख्तूनख्वा प्रांतांत बहुतांश मृत्यू घरांची भिंत किंवा छत कोसळल्याने झाले असून, विशेषतः ग्रामीण भागातील चिखलाच्या वीटांचे घर यासाठी कारणीभूत ठरले आहेत.