Virat Kohli Viral Post: विराट कोहलीचा दोन वर्षांनंतर मोठा निर्णय; सोशल मीडियावरील 'त्या' पोस्टनं खळबळ!

Virat Kohli Post Goes Viral : भारतीय क्रिकेटचा सुपरस्टार विराट कोहली सध्या त्याच्या एका खास सोशल मीडिया पोस्टमुळे जगभरातील चाहत्यांमध्ये चर्चेचा विषय ठरला आहे. न्यूझीलंडविरुद्धच्या महत्त्वाच्या वनडे मालिकेपूर्वी विराटने इन्स्टाग्रामवर आपल्या सराव सत्राचे (Practice Session) फोटो शेअर केले आहेत. विशेष म्हणजे, गेल्या दोन वर्षांपासून विराटने अशा प्रकारचे वैयक्तिक सरावाचे फोटो पोस्ट करणे टाळले होते, त्यामुळे ही पोस्ट पाहताच चाहत्यांमध्ये आनंदाची लाट उसळली आहे.

गेल्या दोन वर्षांपासून विराट कोहली सोशल मीडियावर खूपच मर्यादित सक्रिय होता. त्याच्या पोस्ट्स प्रामुख्याने जाहिराती, पत्नी अनुष्का शर्मासोबतचे फोटो किंवा भारतीय संघाच्या मोठ्या विजयापुरत्याच मर्यादित असायच्या.

मैदानावरील त्याचे सराव सत्रातील फोटो किंवा वैयक्तिक क्रिकेट प्रवासाचे अपडेट्स मिळत नसल्याने चाहते काहीसे नाराज होते. मात्र, न्यूझीलंड मालिकेपूर्वी सरावाचे तीन फोटो शेअर करून विराटने आपण पुन्हा जुन्या रंगात परतल्याचे संकेत दिले आहेत. या पोस्टला अवघ्या काही तासांत लाखो लाईक्स मिळाले असून ती वेगाने व्हायरल होत आहे.

भारत आणि न्यूझीलंड यांच्यातील पहिल्या वनडे सामन्यासाठी विराट कोहली वडोदरा येथे दाखल झाला आहे. वडोदरा विमानतळावर त्याचे जंगी स्वागत करण्यात आले, ज्याचे व्हिडिओ सोशल मीडियावर आधीच चर्चेत आहेत.

विराटने मैदानात येताच सरावाला सुरुवात केली आहे. त्याच्यासोबत केएल राहुल, यशस्वी जयस्वाल आणि हर्षित राणा यांसारखे तरुण खेळाडूही नेटमध्ये जोरदार सराव करताना दिसत आहेत. दक्षिण आफ्रिकेविरुद्धच्या मालिकेत 'प्लेयर ऑफ द सीरिज' ठरलेला विराट आता किवी संघाविरुद्धही धावांचा पाऊस पाडण्यासाठी सज्ज झाला आहे.

शेवटच्या ४ सामन्यांची आकडेवारी

विराट कोहली सध्या आपल्या कारकिर्दीतील सर्वोत्तम फॉर्ममध्ये असल्याचे त्याच्या अलीकडील आकडेवारीवरून स्पष्ट होते. शेवटच्या चार आंतरराष्ट्रीय वनडे सामन्यांमध्ये त्याने सातत्याने धावा केल्या आहेत.

दक्षिण आफ्रिकेविरुद्ध सलग दोन शतके आणि एका अर्धशतकानंतर त्याने विजय हजारे ट्रॉफीमध्येही १३१ आणि ७७ धावांच्या खेळी केल्या आहेत. या जबरदस्त कामगिरीमुळे न्यूझीलंडविरुद्धच्या मालिकेतही चाहत्यांच्या अपेक्षा उंचावल्या आहेत.