Video Viral: धक्कादायक! खुलेआम फायरिंगचा व्हिडिओ व्हायरल; माय-लेकीचा मृत्यू, वडिलांची प्रकृती चिंताजनक

Patna Firing Video Viral: बिहारची राजधानी पाटणा येथून एक धक्कादायक व्हिडिओ समोर आला आहे. येथे दुचाकीस्वार दिवसाढवळ्या गोळीबार करताना व्हिडिओमध्ये दिसत आहे. दुचाकीस्वारांनी एका घरात घुसून एकाच कुटुंबातील 3 जणांवर गोळ्या झाडल्या, ज्यामध्ये आई आणि मुलीचा मृत्यू झाला तर वडिलांची प्रकृती गंभीर आहे. घरात गोळीबार केल्यानंतर गुन्हेगारांनी पळून जातानाही गोळीबार केला, ज्यामुळे परिसरात दहशतीचे वातावरण पसरले.

आधी हा व्हिडिओ पाहा

दरम्यान, ही घटना पाटण्यातील आलमगंज येथील न्यू अरफाबाद कॉलनीतील जटाही मंदिराजवळ घडली, जिथे गुन्हेगारांनी पती, पत्नी आणि मुलीवर गोळ्या झाडल्या, ज्यामध्ये आई आणि मुलीचा जागीच मृत्यू झाला, तर जखमी वडिलांवर रुग्णालयात (Hospital) उपचार सुरु आहेत. घटनेनंतर गुन्हेगारांनी घटनास्थळावरुन पळ काढला.

निवृत्त परिचारिका आणि तिच्या मुलीचा मृत्यू

माहिती मिळताच आलमगंज पोलिस ठाण्याचे पोलिस (Police) घटनास्थळी पोहोचले. त्यांनी तात्काळ तिन्ही पिडितांना पाटण्यातील नालंदा मेडिकल कॉलेज रुग्णालयात दाखल केले. जखमीचे नाव धनंजय मेहता असे आहे, तर त्यांची पत्नी, निवृत्त परिचारिका महालक्ष्मी आणि 19 वर्षांची मुलगी यांचा मृत्यू झाला. हे प्रकरण परिसरातील वादाचे असल्याचे सांगितले जात आहे.

पोलीस आरोपींच्या शोधात व्यस्त

पाटणा शहर पोलीस उपविभागीय अधिकारी अतुलेश झा यांनी या प्रकरणाची पुष्टी केली. झा यांनी सांगितले की, पोलीस संपूर्ण प्रकरणाचा तपास करत आहेत. पोलिसांनी घटनास्थळी एफएसएल टीम आणि श्वान पथकाला बोलावले. पोलिसांकडून आरोपींचा शोध सुरु आहे. पोलिसांनी घटनास्थळावरील सीसीटीव्ही कॅमेरे देखील स्कॅन करण्यास सुरुवात केली.