IRCTC द्वारे घेता येणार समुद्रपर्यटनाचा आनंद, ऑनलाईन होणार बुकिंग

नवी दिल्ली: आयआरसीटीसीच्या वेबसाईटवरून आता समुद्रपर्यटनासाठी तिकिट बुक करता येणार आहे. IRCTC ने यासाठी Cordelia Cruise Company सोबत करार केला आहे. क्रूझ (Cruise) कंपनी 6 सप्टेंबर 2021 पासून आपला पहिला प्रवास सुरू करणार आहे.

ऑनलाईन पोर्टलद्वारे बुकिंग

• आयआरसीटीसीने ऑनलाईन पोर्टलवरून समुद्रपर्यटनचे बुकिंगही सुरू केले आहे. या अंतर्गत पर्यटक गोवा, लक्षद्वीप, कोची आणि श्रीलंका सारख्या ठिकाणी क्रूझ वरून पर्यटनाचा आनंद घेऊ शकतील.

• पहिल्या टप्प्यात क्रूझचा बेस मुंबई असेल. या पॅकेजमध्ये पर्यटकांना गोवा आणि दीव जाण्याची सोय करण्यात आली आहे.

• त्यानंतर क्रूझच्या दुसऱ्या टप्प्यात ऑक्टोबरमध्ये कोची दीव जाण्याची सोय करण्यात येणार आहे. 3 आणि 4 दिवसांच्या या पॅकेजमध्ये, प्रवाशांना लक्षद्वीप, गोवा, मुंबई येथे जाण्याची सोय केली जाईल.

• त्याचा तिसऱ्या टप्प्यात म्हणजेच मे 2022 मध्ये क्रूझ चेन्नईला हलवली जाईल. तेथून या क्रूझचा प्रवास कोलंबो, गाले, जाफना आणि त्रिकोमालीसारख्या ठिकाणी होणार आहे.

तीन श्रेणींमध्ये असणार क्रूझ भाडे

1. हे क्रूझ भाडे तीन श्रेणींमध्ये विभागले गेले आहेत. इकॉनॉमी क्लासमध्ये प्रवास करणाऱ्या प्रवाशांना मुंबई ते गोवा दोन रात्रीच्या प्रवासासाठी 17,877 रुपये मोजावे लागतील.

2. समुद्रमुखी रूमसाठी, मुंबई ते गोवा दौऱ्यासाठी 25,488 रुपये भाडे द्यावे लागेल. हा दौरा दोन रात्रीसाठी असणार आहे.

3. समुद्रमुखी दृश्य असलेल्या बाल्कनी रूमसाठी, मुंबई ते गोवा दौऱ्यासाठी 31,506 रुपये द्यावे लागतील. हा दौरा दोन रात्रींसाठी असेल.

4. या क्रूझवर पंचतारांकित हॉटेल्स सारख्या सुविधा असतील आणि प्रवाशांना स्विमिंग पूल, बार, ओपन थिएटर आणि जिमची सुविधाही उपलब्ध करून देण्यात येणार आहे.

प्रवाशांसाठी असतील हे नियम

IRCTC ने क्रूझ प्रवासाबाबत काही मार्गदर्शक तत्त्वे जारी केली आहेत. या अंतर्गत, क्रूझवर प्रवास करण्यासाठी प्रवाशांनी कोरोना लस घेणे अनिवार्य असणार आहे. क्रूझवर प्रवासासाठी ही एक अत्यंत आवश्यक अट आहे. तसेच 72 तासांपूर्वीचा RT-PCR निगेटिव्ह रिपोर्ट देखील आवश्यक असेल. त्याचबरोबर क्रूझमधील सर्व क्रू मेंबर्सचे लसीकरणही केले जाईल. लोकांच्या सोयीसाठी वैद्यकीय पथक क्रूझवर तैनात केले जाणार आहे. तसेच प्रवाशांची आरोग्य तपासणीही केली जाणार आहे.