Karnataka Assembly Election 2023: कर्नाटकात निवडणूक प्रचाराचा ‘सुपर संडे’

Karnataka Election कर्नाटक विधानसभा निवडणुकीचा प्रचार रविवारी शिगेला पोहोचला. प्रचाराची सोमवारी सांगता होणार असल्याने, भाजप, काँग्रेस, धर्मनिरपेक्ष जनता दल या प्रमुख पक्षांसह सर्वांनीच जास्तीत जास्त मतदारांपर्यंत पोहोचण्याचा प्रयत्न केला.

पंतप्रधान नरेंद्र मोदी यांनी आज शिमोग्गा येथे सभा आणि बंगळुरात रोड शो घेतला; तर प्रियांका गांधी आणि राहुल गांधी यांनी विविध ठिकाणी प्रचार करत भाजपवर टीकास्त्र सोडल्याने राजकीय वातावरण तापले होते.

दर पाच वर्षांनी सत्तांतर होण्याची कर्नाटकात गेल्या 38 वर्षांपासूनची प्रथा आहे. ती मोडून काढण्यासाठी भाजप प्रयत्नशील आहे, तर या महत्त्वाच्या राज्यात पुन्हा सत्तेत येण्यासाठी काँग्रेसने बाजी लावली आहे.

...म्हणून सोनियांना बोलावले

‘पराभवाच्या भयानेच काँग्रेसने सोनिया गांधी यांना विधानसभा निवडणुकीच्या प्रचारासाठी बोलावून घेतले,’ असा टोला पंतप्रधान नरेंद्र मोदी यांनी आज शिमोग्गा येथील प्रचारसभेत बोलताना काँग्रेसला हाणला.

जनतेने काँग्रेसचा खोटारडेपणाचा फुगा फोडला असल्याने भाजपचाच विजय होईल, असा विश्‍वासही त्यांनी व्यक्त केला.

भ्रष्टाचार, बेरोजगारी हाच खरा दहशतवाद : प्रियांका :

‘‘दहशतवाद, राष्ट्रीय सुरक्षा आणि धर्म याविषयी पंतप्रधान बरेच बोलत आहेत. परंतु कर्नाटकातील जनतेला भेडसावत असलेल्या वास्तवातील समस्यांना त्यांनी स्पर्शही केला नाही. 40 टक्के दलाली, भ्रष्टाचार हा कर्नाटकातील खरा दहशतवाद आहे,’’ अशी टीका प्रियांका गांधी यांनी केली.