PM Modi Messi Jersey: पंतप्रधान मोदींना बंगळूरमध्ये मिळाले खास गिफ्ट

PM Modi Messi Jersey: पंतप्रधान नरेंद्र मोदी यांनी सोमवारी (6 फेब्रुवारी) कर्नाटकातील बेंगळुरू येथे 'इंडिया एनर्जी वीक 2023' चे उद्घाटन केले. या वेळी पंतप्रधानांना एक खास भेट मिळाली आहे.

अर्जेंटिनाची ऊर्जा कंपनी YPF चे अध्यक्ष पाब्लो गोन्झालेझ यांनी पंतप्रधान मोदींना अर्जेंटिनाचा स्टार फुटबॉलपटू लिओनेल मेस्सी याच्या नावाची अर्जेंटिना फुटबॉल संघाची जर्सी भेट दिली. जर्सीवर कर्णधार लिओनेल मेस्सीचे नाव आणि त्याचा आयकॉनिक नंबर 10 लिहिलेला आहे.

महान फुटबॉलपटूंपैकी एक मानल्या जाणाऱ्या मेस्सीने गेल्या वर्षी डिसेंबरमध्ये अर्जेंटिनाला फुटबॉल विश्वचषक स्पर्धेत विजेतेपद मिळवून दिले होते. लिओनेल मेस्सीच्या अर्जेंटिनाने फ्रान्सवर पेनल्टी शूटआउटमध्ये 4-2 असा विजय मिळवला होता. 2022 च्या विश्वचषकात मेस्सीने सात गोल केले होते.

अर्जेंटिनाच्या विजयानंतर पंतप्रधान मोदींनी सोशल मीडियावर अर्जेंटिना संघाचे अभिनंदन केले होते. विश्वचषकातील फायनल मॅचनंतर त्यांनी ट्विट केले होते की, "हा आतापर्यंतचा सर्वात रोमांचक फुटबॉल सामना म्हणून लक्षात ठेवला जाईल! अर्जेंटिनाला #FIFAWorldCup चॅम्पियन बनवल्याबद्दल अभिनंदन!

दरम्यान, बंगळुरूमध्ये सुरू असलेल्या 'इंडिया एनर्जी वीक 2023' (IEW) ची सांगता 8 फेब्रुवारीला होणार आहे. या परिषदेत जगभरातील 30 हून अधिक मंत्री सहभागी झाले आहेत.

या परिषदेत बोलताना मोदी म्हणाले होते की, 2070 पर्यंत भारताने उर्जा क्षेत्रात परिपुर्णतेसाठी अनेक पावले उचलण्याची तयारी केली आहे. हरित उर्जेला प्रोत्साहन दिले जाईल. त्यातून रोजगाराच्या अनेक संधी निर्माण होणार आहेत.