Prayagaraj Police Encounter: उमेश पाल हत्याकांडातील आरोपी ठार, नेहरु पार्कमध्ये चकमक

Prayagaraj Police Encounter: राजू पाल खून प्रकरणातील एका आरोपीला पोलिसांनी ठार केले आहे. उत्तर प्रदेश पोलिसांच्या स्पेशल ऑपरेशन ग्रुप आणि जिल्हा पोलिसांनी आरोपी अरबाजला प्रयागराजमधील नेहरु पार्कमध्ये चकमकीत ठार केले.

दरम्यान, 2005 मध्ये बसपा आमदार राजू पाल हत्याकांडातील मुख्य साक्षीदार उमेश पाल याची शुक्रवारी संध्याकाळी उत्तर प्रदेशातील (Uttar Pradesh) प्रयागराज येथील राहत्या घरी गोळ्या झाडून हत्या करण्यात आली. घटनेत वापरलेली क्रेटा कार आरोपी अरबाज चालवत होता. आरोपीचे दोन्ही साथीदार घटनास्थळावरुन पळून गेले होते.

दुसरीकडे, प्रयागराजमध्ये (Prayagraj) हुंडई क्रेटा एसयूव्हीच्या मागील सीटवरुन खाली उतरणाऱ्या उमेश पाल यांची अज्ञात व्यक्तीने गोळ्या झाडून हत्या केली होती. पाल यांना स्वरुप राणी नेहरु रुग्णालयात नेले असता उपचारादरम्यान त्यांचा मृत्यू झाला.

तसेच, हत्येनंतर उमेश पाल यांची पत्नी जया पाल यांनी प्रयागराज पोलिसात तक्रार करुन आरोपीविरुद्ध गुन्हा दाखल केला. माजी खासदार अतिक अहमद यांचा भाऊ, पत्नी सहिस्ता आणि त्यांची मुले अहजान आणि आबान आणि इतर अनेकांविरुद्ध आयपीसी आणि स्फोटक कायद्याच्या संबंधित कलमांखाली गुन्हा दाखल करण्यात आला आहे.