पंतप्रधान मोदी नेपाळ दौऱ्यावर; लुंबिनी येथे महामाया देवीचे घेतले दर्शन

पंतप्रधान नरेंद्र मोदी नेपाळमध्ये पोहचले आहेत. नेपाळचे पंतप्रधान शेर बहादूर देउबा यांनी मोदींचे स्वागत केले. बुद्ध पौर्णिमेनिमित्त लुंबिनी येथे पोहोचलेल्या पंतप्रधान मोदींनी सर्वप्रथम महामाया देवीचे दर्शन घेतले. (PM Narendra Modi on Nepal tour)

यावेळी नेपाळचे पंतप्रधान शेर बहादूर देउबा आणि त्यांची पत्नी पीएम मोदींसोबत उपस्थित होते. आता मोदी बुद्ध पौर्णिमेनिमित्त बौद्ध संस्कृती आणि हेरिटेज सेंटरच्या पायाभरणीसाठी आयोजित समारंभात पंतप्रधान मोदी सहभागी होणार आहेत.

सात सामंजस्य करारांवर स्वाक्षरी होणार
नेपाळच्या परराष्ट्र मंत्रालयाच्या सूत्राने सांगितले की, भारतीय पंतप्रधानांच्या लुंबिनी दौऱ्यादरम्यान दोन्ही देशांमध्ये सात करारांवर स्वाक्षरी केली जाईल. यामुळे शैक्षणिक आणि सांस्कृतिक संबंध अधिक घट्ट होतील.

देउबा आणि मोदींची चर्चा
लुंबिनीमध्ये पंतप्रधान मोदी आणि देउबा यांची चर्चा होणार आहे. जलविद्युत आणि कनेक्टिव्हिटीसह विविध क्षेत्रात सहकार्य वाढवण्यावर या चर्चेत भर दिला जाईल. इंडियन इंटरनॅशनल सेंटर फॉर बुद्धिस्ट कल्चर अँड हेरिटेजच्या पायाभरणीलाही मोदी उपस्थित राहणार आहेत.