Neeraj Chopra Lieutenant Colonel: टोकियो ऑलिम्पिकमध्ये भारतासाठी भालाफेकमध्ये पहिले सुवर्णपदक जिंकणारा स्टार खेळाडू नीरज चोप्रा याच्यासाठी एक मोठा सन्मान आहे. नीरजला आता भारतीय सैन्यात लेफ्टनंट कर्नल (Lieutenant Colonel) ही मानद पदवी (Honorary Rank) प्रदान करण्यात आली. संरक्षण मंत्री राजनाथ सिंह आणि लष्करप्रमुख जनरल उपेंद्र द्विवेदी यांच्या उपस्थितीत नीरजला हा सन्मान देण्यात आला.
नीरज चोप्रा 26 ऑगस्ट 2016 रोजी नायब सुभेदार या पदावर एक ज्युनियर कमिशंड अधिकारी (JCO) म्हणून भारतीय सैन्याच्या राजपूत रेजिमेंटमध्ये रुजू झाला होता. त्यानंतर त्याने आपल्या सेवेत आणि क्रीडा क्षेत्रातील उत्कृष्ट कामगिरीमुळे बढती मिळवली आहे. 2021 मध्ये त्याला सुभेदार आणि 2022 मध्ये सुभेदार मेजर या पदावर पदोन्नती मिळाली होती.
नीरज चोप्राला त्याच्या देदीप्यमान कारकिर्दीसाठी आणि आंतरराष्ट्रीय स्तरावरील अभूतपूर्व कामगिरीसाठी अनेक राष्ट्रीय पुरस्कारांनी सन्मानित करण्यात आले आहे.
अर्जुन पुरस्कार: नीरजला 2018 मध्ये अर्जुन पुरस्काराने सन्मानित करण्यात आले.
खेल रत्न: तसेच, 2021 मध्ये नीरजला खेलरत्न पुरस्कार प्रदान करण्यात आला.
परम विशिष्ट सेवा पदक: टोकियो 2020 ऑलिम्पिकमध्ये ऐतिहासिक सुवर्णपदक जिंकल्यानंतर भारतीय सैन्याचा हा सर्वोच्च शांतताकालीन पुरस्कार त्याला मिळाला.
पद्मश्री: 2022 मध्ये भारताचा (India) चौथा सर्वोच्च नागरिक पुरस्कार देऊन त्याचा गौरव करण्यात आला.
अलीकडेच नीरज चोप्राने विश्व ॲथलेटिक्स चॅम्पियनशिपमध्ये भाग घेतला होता, पण त्याला या स्पर्धेत पदक जिंकता आले नाही. या चॅम्पियनशिपमध्ये त्याने 84.03 मीटरचा सर्वोत्कृष्ट थ्रो केला आणि तो आठव्या स्थानावर राहिला. याच स्पर्धेत भारताचा दुसरा खेळाडू सचिन यादव यानेही भाग घेतला होता. सचिन यादवची कामगिरी नीरज चोप्रापेक्षा चांगली होती. सचिनने 86.27 मीटरचा थ्रो केला होता, मात्र तो देखील पदक जिंकण्यापासून थोडक्यात वंचित राहिला.
नीरज चोप्राने (Neeraj Chopra) आंतरराष्ट्रीय स्तरावर भारताचा मान उंचावण्यासोबतच भारतीय सैन्यातही आपली सेवा सातत्याने सुरु ठेवली आहे. त्याच्या या नवीन मानद पदवीमुळे तो तरुण पिढीसाठी प्रेरणास्त्रोत ठरला आहे.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.