काश्मिर पंडितांना लष्कर-ए-इस्लाम संघटनेची धमकी

काही दिवासांपूर्वीच राहुल भट्ट या काश्मिरी पंडिताची दहशतवाद्यांनी सरकारी कार्यालयात घुसत हत्या केली होती. यावरुन रस्त्यावर उतरत काश्मिरी पंडितांनी सरकारविरोधात निदर्शने केली होती. तसेच विरोधी पक्षांनी आवाज उठवला होता. याला काही दिवस होतात. तोवर पुन्हा एकदा लष्कर-ए-इस्लाम या दहशतवादी संघटनेने जम्मू-काश्मीरमध्ये राहणाऱ्या काश्मिरी पंडितांना धमकी दिली आहे. काश्मीर सोडा नाहीतर मरायला तयार व्हा असे म्हटले आहे. (Lashkar-e-Islam threatens Kashmiri Pandits)

जम्मू-काश्मीरमधील पुलवामा जिल्ह्यातील हवाल ट्रान्झिट निवासस्थानात राहणाऱ्या काश्मिरी पंडितांना लष्कर-ए-इस्लाम या दहशतवादी संघटनेने धमकी दिली आहे. या पत्रात लिहले आहे कि, ‘सर्व स्थलांतरित आणि आरएसएस एजंट यांनी काश्मिर सोडून जावे, अन्यथा मरायला तयार व्हा.

काश्मीरमध्ये आणखी एक इस्त्राईल करून काश्मिरी मुस्लिमांची हत्या करण्याची इच्छा असलेल्या काश्मिरी पंडितांना इथे जागा नाही. तुमची सुरक्षा दुप्पट, तिप्पट केली, तरीही तुम्ही मरणार’ अशी धमकी देण्यात आली आहे. त्यामूळे नागरिकांमध्ये भीतीचं वातावरण निर्माण झालं आहे.

राहुल भट्ट नामक युवकाला दहशतवाद्यांनी केले ठार

काही दिवसांपूर्वीच एका दहशतवादी संघटनेने राहुल भट्ट नावाच्या काश्मिरी पंडितावर गोळ्या झाडून हत्या केली होती. सरकारी कार्यालयात काम करत असताना दहशतवाद्यांनी सरकारी कार्यालयातच घसून त्यांच्यावर गोळ्या झाडल्या. राहुल यांच्या हत्येनंतर काश्मिरी पंडित आक्रमक झाले होते. रस्त्यावर उतरत काश्मिरी पंडितांनी सरकारविरोधात घोषणाबाजी केली होती. तसेच काश्मीरमध्ये पंडित सुरक्षित नसल्याचा आरोपही लावला होता.