T20 World Cup 2026 Schedule: क्रिकेट जगतातील सर्वात मोठ्या स्पर्धांपैकी एक असलेल्या आयसीसी टी-20 विश्वचषक 2026 चे आयोजन भारत आणि श्रीलंका या दोन देशांच्या संयुक्त यजमानपदाखाली पुढील वर्षी फेब्रुवारी महिन्यात होणार आहे. या स्पर्धेच्या वेळापत्रक आणि ग्रुप्सच्या घोषणेकडे सर्व क्रिकेट चाहत्यांचे लक्ष लागून राहिले आहे.
यंदाच्या टी-20 विश्वचषकासाठी आयसीसीकडून जोरदार तयारी सुरु असून मागील स्पर्धेप्रमाणेच यावेळीही एकूण 20 संघ सहभागी होणार आहेत. या सर्व संघांची निवड प्रक्रिया पूर्ण झाली आहे. त्यामुळे कोणत्या संघाला कोणत्या ग्रुपमध्ये स्थान मिळते, यावर आता चर्चा सुरु झाली आहे. विशेषतः भारत (India) आणि पाकिस्तान हे पारंपरिक प्रतिस्पर्धी एकाच ग्रुपमध्ये असतील, अशी शक्यता वर्तवली जात आहे.
क्रिकबझने दिलेल्या वृत्तानुसार, आयसीसी टी-20 विश्वचषक 2026 संदर्भात 25 नोव्हेंबर रोजी मुंबईत एका विशेष कार्यक्रमात ग्रुप्स आणि संपूर्ण वेळापत्रकाची अधिकृत घोषणा करण्याची शक्यता आहे.
चाहत्यांसाठी सर्वात मोठी बातमी म्हणजे, भारत आणि पाकिस्तानच्या (Pakistan) संघांना एकाच ग्रुपमध्ये ठेवले जाण्याची दाट शक्यता आहे. या ग्रुपमध्ये भारत आणि पाकिस्तानसह उर्वरित तीन संघांमध्ये यूएसए, नेदरलँड्स आणि नामिबिया यांचा समावेश होण्याची शक्यता आहे. या स्पर्धेत भारत आणि पाकिस्तान यांच्यातील हाय-व्होल्टेज सामना कोलंबो येथील स्टेडियमवर खेळला जाण्याची शक्यता आहे. डिफेन्डिंग चॅम्पियन असलेला भारतीय संघ या स्पर्धेतील आपला पहिला सामना यूएसए संघासोबत खेळू शकतो.
यजमान श्रीलंका संघाचा ग्रुप मात्र थोडा कठीण आणि आव्हानात्मक असण्याची शक्यता आहे. या ग्रुपला 'ग्रुप ऑफ डेथ' असेही म्हटले जात आहे. श्रीलंकेसोबत या ग्रुपमध्ये ऑस्ट्रेलिया, झिम्बाब्वे, आयर्लंड आणि ओमान या संघांचा समावेश असू शकतो.
या स्पर्धेत 5-5 संघांचे एकूण चार ग्रुप्स तयार केले जाणार आहेत. इतर दोन ग्रुप्सची संभाव्य रचना खालीलप्रमाणे असू शकते. या ग्रुपमध्ये इंग्लंड आणि वेस्ट इंडिजला एकत्र ठेवले जाऊ शकते. त्यांच्यासोबत बांगलादेश, नेपाळ आणि इटली हे संघ असण्याची शक्यता आहे. चौथ्या ग्रुपमध्ये दक्षिण आफ्रिका आणि न्यूझीलंडसारखे मजबूत संघ असतील. त्यांच्यासोबत अफगाणिस्तान, यूएई आणि कॅनडा हे संघ खेळू शकतात.
या टी-20 विश्वचषकातील सामने भारत आणि श्रीलंका या दोन देशांतील मुंबई, कोलकाता, चेन्नई, दिल्ली आणि अहमदाबाद कोलंबो आणि कँडी या प्रमुख शहरांमधील मैदानांवर खेळवले जातील.
टी-20 विश्वचषक 2026 मध्ये प्रत्येक ग्रुपमधून टॉप-2 संघ सुपर-8 स्टेजसाठी पात्र ठरतील. यानंतर सुपर-8 मधील टॉप-4 संघ उपांत्य फेरी आणि त्यातून अंतिम फेरीत प्रवेश करतील. चाहत्यांसाठी 25 नोव्हेंबरची घोषणा रोमांचक आणि उत्सुकतेची ठरणार आहे.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.