USA Cricket Board Suspended: आंतरराष्ट्रीय क्रिकेट परिषद (ICC) ने अमेरिकेच्या क्रिकेट मंडळाला (USA Cricket) एक मोठा धक्का दिला. आयसीसीने या क्रिकेट मंडळाचे सदस्यत्व तात्काळ प्रभावाने निलंबित केले. मंगळवारी (23 सप्टेंबर) झालेल्या 'व्हर्च्युअल बोर्ड मीटिंग'मध्ये आयसीसीने हा महत्त्वपूर्ण निर्णय घेतला. प्रशासकीय स्तरावर सातत्याने सुरु असलेल्या वादामुळे आणि आयसीसीच्या निर्देशांचे पालन न केल्यामुळे ही कारवाई करण्यात आली.
अमेरिकेच्या क्रिकेट मंडळात (USA Cricket) गेल्या अनेक वर्षांपासून प्रशासकीय स्तरावर वाद सुरु आहे. बोर्डाचे अध्यक्ष वेणु पिसिके यांनी आयसीसी (ICC) आणि युनायटेड स्टेट्स ऑलिंपिक आणि पॅरालिंपिक कमिटी (USOPC) दोघांच्याही नेतृत्वात बदल करण्याच्या सूचनांना विरोध केला होता. याच कारणामुळे गेल्या वर्षी टी-20 विश्वचषकानंतर जुलैमध्ये USA क्रिकेट बोर्डाला एक नोटीस पाठवण्यात आली होती.
आयसीसीने USA क्रिकेट बोर्डाला एक वर्षाच्या आत सर्व सुधारणा करण्याचे निर्देश दिले होते. मात्र, निर्धारित मुदत संपल्यानंतरही त्यांच्या कामकाजात कोणतीही सुधारणा झाली नाही. त्यामुळेच आयसीसी कठोर कारवाई करण्याच्या मनस्थितीत होती. 19 जुलै रोजी सिंगापूरमध्ये झालेल्या आयसीसीच्या बोर्ड बैठकीत USA क्रिकेटला आणखी तीन महिन्यांची मुदत देण्यात आली होती. परंतु, त्यानंतरही USA क्रिकेट बोर्डाने आपली मनमानी सुरुच ठेवल्यामुळे अखेर आयसीसीने ही कठोर कारवाई केली.
सदस्यत्व निलंबित करण्यात आले असले तरी, अमेरिकेचा संघ पुढील वर्षी होणाऱ्या टी-20 विश्वचषकात सहभागी होणार आहे. आयसीसीच्या या कारवाईमुळे अमेरिकेच्या क्रिकेटमध्ये मोठे बदल होण्याची शक्यता आहे.
दरम्यान, या कारवाईचा 2019 मध्ये लॉस एंजलिस येथे होणाऱ्या ऑलिंपिक खेळांमधील क्रिकेट स्पर्धेवर कोणताही परिणाम होणार नाही. यजमान देश असल्यामुळे अमेरिकेचा क्रिकेट संघ 2028 च्या ऑलिंपिक स्पर्धेत सहभागी होणाऱ्या सहा संघांपैकी एक असू शकतो.
ईएसपीएन क्रिकइन्फोच्या अहवालानुसार, USA क्रिकेट बोर्डाचे अध्यक्ष वेणु पिसिके यांनी या निलंबनाबाबत आयसीसीने अद्याप त्यांच्याशी संपर्क साधला नसल्याचे म्हटले. त्यामुळे पुढील काळात अमेरिका क्रिकेटमध्ये आणखी काय घडामोडी होतात, हे पाहणे महत्त्वाचे ठरेल.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.