'मंदिर वहीं बनाएंगे'; कॉंग्रेस नेते आक्रमक

राजस्थानमधील अलवर येथील 300 वर्षे जुने मंदिर पाडण्याच्या प्रकरणावरून आता काँग्रेस आक्रमक झाली आहे. काँग्रेस नेत्यांच्या शिष्टमंडळाने अलवर जिल्ह्यातील राजगडला भेट दिली. यावेळी काँग्रेस नेत्यांनाही जनतेच्या रोषाला सामोरे जावे लागले. त्याच ठिकाणी मंदिर पुन्हा बांधले जाईल, अशी घोषणा काँग्रेस नेते भंवर जितेंद्र सिंह यांनी केली आहे. (Congress aggressive over temple demolition in Rajasthan)

भंवर जितेंद्र सिंह म्हणाले, मला खात्री द्यायची आहे की त्याच ठिकाणी मंदिर बांधले जाईल. तसेच मंदिर पाडण्यास जबाबदार असणाऱ्यांवर एफआयआर दाखल करण्यात येणार असल्याचेही त्यांनी सांगितले. तत्पूर्वी काँग्रेस नेते घटनास्थळी पोहोचल्यावर लोकांनी त्यांच्याविरोधात घोषणाबाजी केली. लोकांनी अशोक गेहलोत आणि भंवर जितेंद्र सिंह यांच्याविरोधातही घोषणाबाजी केली. राजगडमध्ये जी तीन मंदिरे (Temples) पाडण्यात आली होती ती पुन्हा बांधण्यात येणार असल्याचेही जिल्हा प्रशासनाने जाहीर केले आहे.

दुसरीकडे, ऑल इंडिया मजलिस-ए-इत्तेहादुल मुस्लिमीन (AIMIM) अध्यक्ष असदुद्दीन ओवेसी यांनी या घटनेचा निषेध केला आहे. ओवेसी म्हणाले की, भाजपच्या नेतृत्वाखालील म्युनिसिपल बोर्डाने हा निर्णय घेतला आणि काँग्रेस सरकारने प्राचीन मंदिर पाडण्याचा निर्णय मान्य केला. याला काँग्रेस आणि भाजप हे दोघेही तितकेच जबाबदार आहेत. त्यांनी जनतेची माफी मागितली पाहिजे.

विरोधी भारतीय जनता पक्षाच्या (भाजप) नेत्यांचे शिष्टमंडळही अलवर जिल्ह्यातील राजगड येथे पोहोचले. भाजप (BJP) खासदार किरोडीलाल मीणा यांनी ही कारवाई दबावाखाली केलेली असल्याचे म्हटले आहे. अलवर जिल्ह्यातील राजगढमधील 300 वर्षे जुने मंदिर पाडल्यानंतर हिंदुत्ववादी संघटना संतप्त झाल्या आहेत.