Stokes- Archer Fight: अ‍ॅशेसमध्ये हाय-व्होल्टेज ड्रामा! बेन स्टोक्स आणि जोफ्रा आर्चर भरमैदानात भिडले Watch Video

Ben Stokes- Jofra Archer Fight

ॲडलेड: ऑस्ट्रेलिया आणि इंग्लंड यांच्यातील प्रतिष्ठित 'एशेज' मालिकेदरम्यान सध्या कमालीचा तणाव पाहायला मिळत आहे. या मालिकेतील सलग दोन पराभवांमुळे आधीच दबावात असलेल्या इंग्लंड संघातील अंतर्गत मतभेद आता चव्हाट्यावर आले आहेत. ॲडलेड कसोटीच्या पहिल्या दिवशी इंग्लंडचा कर्णधार बेन स्टोक्स आणि वेगवान गोलंदाज जोफ्रा आर्चर यांच्यात मैदानातच जोरदार वादावादी झाली. या घटनेचा व्हिडिओ सोशल मीडियावर प्रचंड व्हायरल झाला असून, क्रिकेट वर्तुळात याची मोठी चर्चा रंगली आहे.

फिल्डिंग लावण्यावरून जुंपली

हा वाद ऑस्ट्रेलियाच्या डावातील सुरुवातीच्या टप्प्यात घडला, जेव्हा कांगारूंनी १ बाद ४८ अशी मजल मारली होती. मिळालेल्या माहितीनुसार, कर्णधार बेन स्टोक्सने लावलेल्या क्षेत्ररक्षणाबाबत (Field Placement) जोफ्रा आर्चरने नाराजी व्यक्त केली. आर्चर सातत्याने तक्रार करत असल्याचे पाहून बेन स्टोक्सचा पारा चढला.

त्याने आर्चरला खडसावत म्हटले की, "जेव्हा तू गोलंदाजी करतोस, तेव्हा फिल्डिंगबद्दल कुरकुर करू नकोस. तुझे लक्ष फक्त स्टंपवर बॉलिंग करण्याकडे ठेव." या शाब्दिक चकमकीनंतर वाद वाढल्याने बेन डकेटसह इतर खेळाडूंनी मध्यस्थी करून आर्चरला शांत केले.

आर्चरचे चोख प्रत्युत्तर

कर्णधाराशी झालेल्या वादानंतर जोफ्रा आर्चरने आपल्या रागाचा उपयोग गोलंदाजीसाठी केला. त्याने ऑस्ट्रेलियाच्या फलंदाजांना सळो की पळो करून सोडले. २०१९ नंतर पहिल्यांदाच आर्चरने कसोटीच्या एका डावात ५ गडी बाद करण्याचा पराक्रम केला. मैदानावर झालेल्या अपमानजनक वागणुकीला त्याने आपल्या कामगिरीतून दिलेले हे एक सडेतोड उत्तर मानले जात आहे. आर्चरच्या या माऱ्यामुळे ऑस्ट्रेलियाच्या डावाला लगाम बसला.

फलंदाजीत जमली जोडी

पहिल्या दिवशी एकमेकांवर धावून जाणारे स्टोक्स आणि आर्चर दुसऱ्या दिवशी चक्क एकत्र फलंदाजी करताना दिसले. ९ व्या विकेटसाठी या दोघांनी ४५ धावांची अभेद्य भागीदारी करत इंग्लंडचा डाव सावरण्याचा प्रयत्न केला.

दिवसअखेर जोफ्रा आर्चर ३० धावांवर नाबाद असून, ज्या कर्णधाराशी त्याचा वाद झाला होता, त्याच स्टोक्सच्या साथीने तो आता इंग्लंडला संकटातून बाहेर काढण्यासाठी झुंज देत आहे. सलग दोन सामने हरल्यानंतर इंग्लंडसाठी ही कसोटी जिंकणे अत्यंत प्रतिष्ठेचे झाले आहे.