Encounter in Kashmir: शोपियाँत एनकाऊंटरमध्ये 4 दहशतवाद्यांचा खात्मा

Encounter in Kashmir: जम्मू-काश्मिरमध्ये दोन वेगवेगळ्या ठिकाणी झालेल्या चकमकीत चार स्थानिक दहशथवाद्यांचा सुरक्षायंत्रणांनी खात्मा केला. लष्करातर्फे जम्मू-काश्मिरात ऑपरेशन ऑलआऊट चालवले जात आहे.

शोपियाँ येथील द्राच भागात मंगळवारी सायंकाळी चकमकीस सुरुवात झाली होती. त्यात जेश-ए-मोहम्मद (JeM) चे तीन स्थानिक दहशतवादी मारले गेले हनान बिन याकूब आणि जमशेद अशी त्यातील दोघांची नावे आहेत. त्यांची ओळख पटली आहे. ते दोघेही पुलवामातील पिंगलाना येथील आहेत.

एसपीओ कर्मचारी आणि पश्चिम बंगालच्या मजुराच्या हत्येप्रकरणात दोघांचा सहभाग होता. द्राचमध्ये दहशतवादी लपल्याची माहिती मिळाल्यानंतर पोलिस, सैन्यदल यांच्या संयुक्त पथकाने शोधमोहिम राबवली. यावेळी दहशतवाद्यांनी गोळीबारास सुरवात केली. प्रत्युत्तरात पथकाने केलेल्या गोळीबारात तिघांचा मृत्यू झाला.

दरम्यान, बुधवारी मुलू येथे झालेल्या चकमकीत सुरक्षा यंत्रणांनी लष्कर ए तोयबाच्या (LET) एका दहशतवाद्याला कंठस्नान घातले. मुलूमध्ये अद्यापही चकमक सुरु आहे.

यापुर्वी २ ऑक्टोबर रोजीही शोपियाँत बसकुचन इमामसाहिब भागात चकमकीत नसीर अहमद भट हा दहशतवादी मारला गेला होता. त्याच्याकडून एके ४७ रायफलसह शस्त्रास्त्रे आणि दारूगोळा जप्त केला गेला होता.

गेल्या ८ दिवसात जम्मू-काश्मिरात ११ दहशतवादी मारले गेले आहेत. ३० सप्टेंबर रोजी सुरक्षारक्षकांनी बालामुला येथे जैश ए मोहम्मदच्या दोन दहशतवाद्यांना कंठस्नान घातले होते. काश्मिर खोऱ्यात लष्कराचे सध्या ऑपरेशन ऑलआऊट सुरू आहे. कुलगाम जिल्ह्यात अहवातू येथे २७ सप्टेंबर रोजी जैशच्या दोघा दहशतवाद्यांचा खात्मा केला गेला होता. तर २६ सप्टेंबर रोजी बटपोरा भागातील दहशतवाद्यास मारले गेले होते.