Tomato Price: केंद्र सरकारने सर्वसामान्यांना दिला मोठा दिलासा, 14 जुलैपासून मिळणार स्वस्त टोमॅटो

Tomato Price Hike: देशभरात टोमॅटोचे वाढलेले भाव कमी करण्याचा निर्णय केंद्र सरकारने घेतला असून, त्यासाठी आता सरकारकडून टोमॅटो स्वस्त दरात विकले जाणार आहेत.

केंद्राने बुधवारी सहकारी संस्था नाफेड आणि राष्ट्रीय ग्राहक सहकारी महासंघ (NCCF) यांना आंध्र प्रदेश, कर्नाटक आणि महाराष्ट्रातून टोमॅटो खरेदी करण्याचे निर्देश दिले आहेत. सर्वसामान्यांना दिलासा देण्यासाठी प्रमुख ग्राहक केंद्रांवर कमी दराने टोमॅटोचे वाटप केले जाणार आहे.

14 जुलैपासून टोमॅटो स्वस्तात विकले जाणार आहेत

दरम्यान, गेल्या महिनाभरात टोमॅटोचे (Tomato) दर झपाट्याने वाढले आहेत. ग्राहक व्यवहार मंत्रालयाने एका निवेदनात म्हटले आहे की, 14 जुलैपासून टोमॅटो दिल्ली-एनसीआरमधील ग्राहकांना कमी दराने विकले जातील.

किलोमागे 200 रुपयांपर्यंत भाव वाढले

मुसळधार पावसामुळे पुरवठा खंडित झाल्यामुळे देशातील अनेक भागांमध्ये टोमॅटोचे भाव 200 रुपये किलोपर्यंत वाढले आहेत. राष्ट्रीय कृषी सहकारी विपणन महासंघ (NAFED) आणि राष्ट्रीय ग्राहक सहकारी महासंघ (NCCF) टोमॅटो खरेदी करतील.

मंत्रालयाने माहिती दिली

मंत्रालयाच्या म्हणण्यानुसार, ज्या ठिकाणी किमती गेल्या एका महिन्यात राष्ट्रीय सरासरीपेक्षा जास्त आहेत अशा ठिकाणी कमी किमतीत टोमॅटोचे वितरण केले जाईल. मंत्रालयाने सांगितले की, ज्या ठिकाणी टोमॅटोचा वापर जास्त आहे, त्यांना वितरणासाठी प्राधान्य दिले जाईल.

जुलै-ऑगस्टमध्ये टोमॅटोचे उत्पादन कमी होते

जुलै-ऑगस्ट आणि ऑक्टोबर-नोव्हेंबरमध्ये टोमॅटोचे उत्पादन कमी असते, असेही मंत्रालयाने म्हटले आहे. याशिवाय जुलैमध्ये पावसाळ्यामुळे वाहतुकीशी संबंधित अडचणींमुळेही दर वाढले आहेत.

टोमॅटो प्रामुख्याने हिमाचलमधून येतात

दिल्ली (Delhi) आणि आसपासच्या राज्यात प्रामुख्याने हिमाचल प्रदेशातून टोमॅटोची आयात होते. याशिवाय टोमॅटो उत्पादनात दक्षिणेकडील राज्ये आघाडीवर आहेत.