फोंडा: ओकांब-धारबांदोडा येथे शनिवारी दुपारी मित्रांसोबत वाढदिवस साजरा करण्यासाठी आलेला प्रथम सूरज सावंत (२१, माशे-काणकोण) हा युवक दूधसागर नदीत आंघोळ करीत असताना अचानक पाण्यात बुडाला. वाढदिवसाच्याच दिवशी ही घटना घडली असून याची माहिती मिळताच फोंडा पोलिस व अग्निशमन दलाच्या कर्मचाऱ्यांनी घटनास्थळी धाव घेतली. ओकांब येथील नदीच्या पाण्यात बेपत्ता झालेल्या युवकांचा शोध घेण्यास सुरुवात केली.

प्राप्त माहितीनुसार, शनिवारी दुपारी आपला वाढदिवस साजरा करण्यासाठी प्रथम सावंत हा आपल्या मैत्रिणीबरोबर तिस्क-उसगाव येथे त्याचा मित्र प्रदीप वाघ याच्या घरी आला होता. नंतर दुपारी ओकांब येथील दूधसागर नदीत प्रथम सावंत, मैत्रीण व मित्रासोबत आंघोळीसाठी गेला होता. आंघोळ करीत असतानाच प्रथम पाण्यात गटांगळ्या खाताना त्याचा मित्र प्रदीप वाघला दिसला. प्रदीपने त्याला पाण्यातून बाहेर काढण्याचा प्रयत्न केला; पण त्याला यश आले नाही. नंतर प्रदीप वाघ याने पाण्याच्या बाहेर येऊन आपल्या अन्य मित्रांना ओकांब येथे नदीच्या काठी बोलवून घेतले व फोंडा पोलिस व अग्निशमन दलाच्या कर्मचाऱ्यांना पाचरण करण्यात आले.

अग्निशमन दलाच्या कर्मचाऱ्यांनी कॅमेऱ्याच्या माध्यमातून बेपत्ता झालेल्या युवकाचा शोध घेण्याचा प्रयत्न केला. पण कॅमेऱ्यात तो काही दिसला नाही. रात्र झाल्याने शोधकार्य थांबविण्यात आले. फोंडा पोलिस स्थानकाचे ताबा असलेले म्हार्दोळ पोलिस स्थानकाचे निरीक्षक योगेश सावंत यांनी घटनास्थळी जाऊन पाहणी केली. पाण्यात बेपत्ता झालेल्या युवकाचा रविवारी (ता.२७) सकाळी पुन्हा शोध घेण्यात येणार आहे.

ओकांब येथील दूधसागर नदीवर ही दुसरी घटना घडल्याने स्थानिक लोकांमध्ये चिंतेचे वातावरण पसरले आहे. गेल्या १६ फेब्रुवारी रोजी ओकांब येथे याच ठिकाणी दिल्ली येथील युवकाचा बुडून मृत्यू झाला होता.

तीन दिवसांत दोन घटना

दूधसागर नदीत अवघ्या तीन दिवसांत दोन युवक बुडण्याची घटना घडली. ताकार-दावकोण येथील दूधसागर नदीवर गुरुवारी (ता.२४) सायंकाळी आंघोळीसाठी गेलेला वास्को येथील युवक बुडाला होता. शुक्रवारी सकाळी अग्निशमन दलाच्या कर्मचाऱ्यांनी शोध घेऊन हा मृतदेह पाण्यातून बाहेर काढला होता. शनिवारी पुन्हा एकदा बुडण्याची घटना घडली असल्याने स्थानिकांनी चिंता व्यक्त केली आहे.