Western Bypass Problems

सासष्टी: पश्र्चिम बगल रस्त्यामुळे अनेकांना फायदा होत असला तरी नावेली व तळावली येथील रहिवाशांसाठी हा रस्ता त्रासदायक ठरत आहे. या रस्त्याखालून जात असलेला अंडरपासामुळे अपघाताची स्थिती उद्‍भवत आहे. तसेच बगल रस्त्यावरून कचरा फेकण्याचे प्रकार घडत आहेत. त्यामुळे काही काळाने या रस्त्यावर कचऱ्याच्या राशी दिसू लागतील, अशी भीती स्थानिक व्यक्त करत आहेत.

या अंडरपास रस्त्यालगत चारही बाजूंनी गतिरोधक घालणे आवश्यक आहे. तसेच जिथे कचरा टाकला जातो तिथे सीसीटीव्ही कॅमेरे बसविण्याची मागणी करण्यात येत आहे.

आंतोनियो फर्नांडिस यांनी सांगितले की, या भागात वाहन चालविणे धोकादायक ठरत आहे. इथे सिग्नल व दिशा दर्शविणारे, माहिती देणारे फलकांची आवश्यकता आहे. काही दिवसांपूर्वी आम्ही या पश्र्चिम बगल रस्त्यावरील उड्डाणपुलाचा पाहणी केली होती व गतिरोधकाची आवश्यकता व्यक्त केली होती असे त्यांनी सांगितले.

रॉक फर्नांडिस यांनी सांगितले की, केवळ विकास करून भागणार नाही, तर ते करताना गतिरोधक, फलक, सीसीटीव्ही कॅमेरे सारख्या बारीक सारीक गोष्टीचा विचार केला पाहिजे. गेल्या चार पाच दिवसांत या भागात पाच ते सहा अपघात झाल्याचे त्यांनी सांगितले. फ्रॅंकी डिसोझा यांनी सांगितले की, येथे कचरा कोण आणून टाकतो, यावर आपण गेले तीन रात्री जागरण करून पाळत ठेवली पण कोणी सापडले नाही. बहुधा पहाटे हा कचरा फेकला जात असावा. पंचायत, सरकारने त्वरित याची दखल घेऊन उपाययोजना करणे आवश्यक असल्याचेही त्यांनी सांगितले.