म्हापसा: मंत्री नीळकंठ हळर्णकर हे जीएसटी उत्सव जागृती कार्यक्रम करतेवेळी आरजीपीचे सर्वेसर्वा मनोज परब व त्यांच्या इतर कार्यकत्यांनी बेकायदेशीरपणे जमाव करुन लोकांना चिथावण्याचा प्रयत्न केला होता.

संशयितांनी लोकांमध्ये शत्रुत्व निर्माण करुन, पिर्ण गावाची शांतता भंग करण्याचा प्रयत्न केल्याप्रकरणी कोलवाळ पोलिसांनी मनोज परब यांच्यासह इतर कार्यकत्यांविरुद्ध भारतीय न्याय संहितेच्या विविध कलमांअंतर्गत गुन्हा नोंदविला आहे. ही घटना गेल्या शुक्रवारी (ता. २६ सप्टेंबर) घडली होती. गुन्हा नोंद केलेल्यांमध्ये सुबोध कांदोळकर, सिप्रियानो परेरा, अंकुश पार्सेकर, सीताराम सातार्डेकर, संजय देसाई, रोहन कळंगुटकर व इतरांचा समावेश आहे.

या प्रकरणाबाबत कोलवाळ पोलिसांनी संशयित मनोज परब व आरजीपी कार्यकत्यांना 30 सप्टेंबर सकाळी १० वाजता पोलीस स्थानकात हजर राहण्यासंबंधी नोटीस बजावली होती. त्यानुसार, मनोज परब व इतर संशयितांनी स्थानकात हजेरी लावत, तपास अधिकाऱ्यांसमोर आपला जबाब नोंदविला.