राज्यात गेल्या काही दिवसांपासून डोंगरी कापणीचा मुद्दा चांगलाच गाजत आहे. काही दिवसांपूर्वीच, फोंडा तालुक्यातील प्रियोळ भागात बेकायदा डोंगर कापणी केल्याप्रकरणी अज्ञाताविरुद्ध म्हार्दोळ पोलिसांनी गुन्हा नोंदवला होता. तर मोरजीतही डोंगर कापणीच्या विरोधात ग्रामस्थ रस्त्यावर उतरलेत. काल (19 ऑगस्ट) राज्याचे नगरनियोजन मंत्री विश्वजित राणे यांनी पत्रकार परिषद घेऊन डोंगर कापणीच्या मुद्यावर सख्त भूमिका घेतली. राणेंनी डोंगर कापणी करणाऱ्या लोकांना चांगलाचं सज्जड दम दिला. यातच आता, वाळपई शहरापासून अवघ्या सात किलोमीटर अंतरावर निसर्गाच्या सानिध्यात वसलेलं धारकण हे गावही विध्वंसाच्या वाटेवर पोहोचले आहे. धारकणमध्येही मोठ्याप्रमाणात डोंगर कापणी केली जात असल्याने याला आळा बसवण्यासाठी तात्काळ कारवाई करण्यात यावी अशी मागणी येथील ग्रामस्थ करतायेत.