वीस वर्षांच्या प्रखर संघर्षानंतर अनूसुचित जमातीसाठीच्या राजकीय आरक्षण प्रश्‍नाला योग्य दिशा लाभली आहे. केंद्रीय कायदा मंत्री अर्जुन राम मेघवाल यांनी संसदेत अनुसूचित जमातीसाठी राजकीय आरक्षणासाठीचे विधेयक मांडले. या विधेयकाचे ‘उटा’ने स्वागत केले असून सहा महिन्यांत या विधेयकाला कायद्याचे स्वरुप प्राप्त होईल, अशी शक्यताही उटाचे अध्यक्ष प्रकाश वेळीप यांनी येथे घेतलेल्या पत्रकार परिषदेत व्यक्त केली. याचदरम्यान आता, बस मालक संघटनेचे अध्यक्ष सुदीप ताम्हणकर यांनी पत्रकार परिषद घेऊन भंडारी समाजासाठीही राजकीय आरक्षणाची मागणी केली. भंडारी समाजाच्या संघटनेने आरक्षण मिळवण्यासाठी पुढे यावे, असे आवाहनही त्यांनी केले. 12 मतदारसंघात भंडारी समाजासाठी आरक्षण देण्यात यावे अशी मागणी ताम्हणकर यांनी केली.