मडगाव: सारझोरा येथील प्रस्‍ताविक रेल्‍वे स्‍थानकाला विरोध करण्‍यासाठी वेळ्‍ळीचे आमदार क्रुझ सिल्‍वा यांच्‍या नेतृत्‍वाखाली स्‍थानिकांनी रस्‍त्‍यावर उतरून निदर्शने केली.

या रेल्‍वे स्‍थानकामुळे या भागातील पर्यावरणावर विपरीत परिणाम आणि लोकांच्‍या शांततापूर्ण जीवनशैलीवर होणाऱ्या संभाव्य परिणामाबद्दल चिंता व्यक्त केली. सरपंच लिओना फर्नांडिस आणि इतर पंचायत सदस्यांनी वेळ्‍ळीचे आमदार क्रूझ सिल्वा यांना निवेदन सादर करून प्रकल्पाला विरोध करण्याचे आवाहन केले. सारझोरा हे पर्यावरणीयदृष्ट्या संवेदनशील क्षेत्र आहे. या भागात वन्यजीवांचा अधिवास असून येथील लोक शेती व्‍यवसाय करतात. या भागात रेल्‍वेची वाहतूक वाढल्‍यास या सर्वावर विपरीत परिणाम होईल, असा दावा यावेळी स्‍थानिकांनी केला.

लोकांनी यावेळी रेल्‍वे अधिकाऱ्यांवर आरोप करताना विद्यमान रेल्वे क्रॉसिंगवर रोड ओव्हरब्रिजची गावच्या लोकांची दीर्घकाळापासूनची मागणी दुर्लक्षित केल्याचा दावा केला.