Valpoi Rice Farming

वाळपई: गेल्या काही दिवसांपासून पावसाने उसंत घेतल्यामुळे अखेर वाळपई भागात भातकापणीच्या कामाला जोरदार सुरुवात करण्यात आली.

यंदा लांबलेल्या पावसामुळे राज्यातील बहुतेक भागात भातकापणीला विलंब झाला असून शेतकऱ्यांचे मोठ्या प्रमाणात नुकसान झाले आहे. वाळपई येथील हळदणकर यांची शेती पावसामुळे पाण्याखाली गेली होती. मात्र, लवकरात लवकर कापणी करणे गरजेचे होते. त्यामुळे आता ज्यांच्या शेतात एका बाजूला कापणी तर दुसऱ्या बाजूला भाताची मळणी सुरू आहे. शेतात पाणी भरल्यामुळे भातकापणी करताना कामगारांना काही प्रमाणात अडथळा येत आहे.

सत्तरी तालुक्यातील वेगवेगळ्या भागात सध्या खरीप भातपिकाच्या कामाला सुरुवात करण्यात आली असून अंतिम टप्प्यातील कापणी आणि मळणीची कामे सुरू आहेत. त्यात यंदा संततधार पाऊस पडल्याने काही प्रमाणात भातांना कीड लागली होती. तसेच पिकाची पक्ष्यांकडूनही नासाडी झालेली आहे.