विधानसभा सभापती आणि भाजपचे ज्येष्ठ नेते रमेश तवडकर आणि कला-सांस्कृतिक मंत्री गोविंद गावडे यांच्यातील वाद राज्याला नवा नाहीये. मात्र गेल्या काही दिवसांपासून तवडकर आणि गावडे पुन्हा एकमेकांवर शाब्दिक हल्ले करु लागले आहेत. यातच आता, सभापती तवडकर यांच्या एका वक्तव्याची राज्याच्या राजकीय वर्तुळात जोरदार चर्चा होत आहे. 'काही लोकांच्या सावलीजवळही उभे राहायची माझी इच्छा नाही', असे वक्तव्य केल्याने तवडकर पुन्हा राजकीय चर्चेच्या केंद्रस्थानी आले आहेत. तवडकरांच्या या वक्तव्यावरुन सावंत सरकारमध्ये सर्वकाही अलबेल नाही हेच दाखवून दिले आहे. त्यांनी आपल्या वक्तव्याने कोणाचेही नाव घेतले नाही. मात्र हा निशाणा गावडेंना तर नव्हता ना अशी चर्चा आता राजकीय वर्तुळात सुरु झाली आहे.