गोव्यातील नास्नोळा परिसरात एका घराला शॉर्ट सर्किटमुळे भीषण आग लागल्याची घटना घडली आहे. या आगीत घरातील संपूर्ण सामान जळून खाक झाले असून, अंदाजे 5 लाख रुपयांचे नुकसान झाले आहे. सुदैवाने, या घटनेत कोणतीही जीवितहानी झाली नाही, कारण घरातील सर्व सदस्य वेळीच बाहेर पडले होते. स्थानिक रहिवासी दिनेश नाईक यांच्या घरात शनिवारी (18 मे) संध्याकाळी ही घटना घडली. अचानक त्यांच्या घरातून धुराचे लोट आणि आगीच्या ज्वाळा बाहेर पडताना पाहून शेजाऱ्यांनी तातडीने आरडाओरडा सुरु केली. आगीची माहिती मिळताच स्थानिक रहिवाशांनी आग विझवण्यासाठी तात्काळ प्रयत्न सुरु केले, पण आगीने रौद्र रुप धारण केल्यामुळे त्यांचे प्रयत्न अपुरे पडले. आग इतक्या वेगाने पसरली की, घरातील वस्तू बाहेर काढण्यासाठीही वेळ मिळाला नाही.