राज्यात सध्या अवकाळी पावसाने धूमशान घातले असताना नैऋत्य मॉन्सूनच्या पार्श्वभूमीवर मुख्यमंत्री डॉ. प्रमोद सावंत यांनी सोमवारी (19 मे) राज्यातील मॉन्सूनपूर्व तयारीचा सविस्तर आढावा घेतला. पर्वरी येथे मुख्यमंत्र्यांच्या अध्यक्षतेखाली राज्य आपत्ती व्यवस्थापन प्राधिकरणाची महत्त्वपूर्ण बैठक पार पडली. या बैठकीसाठी केंद्रीय यंत्रणांच्या अधिकाऱ्यांसह राज्याच्या विविध विभागांचे वरिष्ठ अधिकारी उपस्थित होते. मुख्यमंत्री सावंत यांनी यावेळी काही सूचना देखील केल्या.

पावसाळ्यात उद्भवणाऱ्या समस्यांवर तात्काळ उपाययोजना करण्यासाठी प्रत्येक विभागाने एक नोडल अधिकारी नियुक्त करावा. यासोबतच सार्वजनिक बांधकाम विभागाला जीर्ण आणि धोकादायक इमारतींची यादी तयार करुन त्यावर तात्काळ कारवाई करण्याचे आदेश मुख्यमंत्र्यांनी दिले.