सासष्टी: मडगावच्या रवींद्र भवनातील पाय तियात्रिस्त हे मुख्य सभागृह दुरुस्तीच्या कारणास्तव गेले दोन ते अडीच महिन्यांपासून बंद आहे. गेल्या पाच-सहा दिवसांत जोरदार पाऊस पडत आहे व त्याचा परिणाम रवींद्र भवनवरही झाला असून आत पाणी गळती होताना दिसत आहे. काही मजुरांना पाणी पुसून काढण्याचेच काम देण्यात आले आहे.

मुख्य प्रवेशद्वाराजवळील स्वागत लॉबी, पहिल्या मजल्यावर परिषद सभागृहाकडील जागेत व कॅण्टिनच्या परिसरात ही गळती मोठ्या प्रमाणात होताना दिसत आहे.

आपण इथे कॅण्टिनमध्ये चहा पिण्यासाठी आलो होतो; पण मोठ्या प्रमाणात होत असलेली गळती पाहून आश्र्चर्य वाटले. रवींद्र भवनचे बांधकाम पूर्ण झाल्यास १६ ते १७ वर्षे झाली असतील, तरी मुख्य कॉंक्रिट स्लॅबमधून पाणी गळती होणे ही गंभीर बाब आहे, असे दवर्लीचे पंच हेर्कुलान नियासो यांनी सांगितले.