म्हापसा शहरात सोमवारी (दि.२९) रात्री दोन रेंट-अ-बाईक चालकांमध्ये झालेल्या भीषण वादाचे रूपांतर रक्तरंजित संघर्षात झाले. या भांडणादरम्यान संतापलेल्या आरोपीने दुसऱ्या चालकाच्या कानाचा लचका तोडल्याची धक्कादायक घटना घडली आहे. नितेश कांदोळकर (रा. बस्तोडा) असे जखमी चालकाचे नाव असून, त्याला उपचारासाठी तातडीने गोवा वैद्यकीय महाविद्यालयात हलवण्यात आले आहे. म्हापसा पोलिसांनी याप्रकरणी समीर पेडणेकर या संशयिताला ताब्यात घेतले आहे. या हिंसक प्रकारामुळे परिसरात काही काळ भीतीचे वातावरण पसरले होते. पोलीस सध्या या वादाचे नेमके कारण शोधण्यासाठी पुढील तपास करत आहेत.