डिचोली: डिचोलीतील विविध देवस्थानात महाशिवरात्री उत्सव परंपरेप्रमाण साजरा करण्यात येणार आहे. पुरातन इतिहास आणि श्रद्धास्थान असलेल्या मुळगावमधील ‘रामनाथ’ या स्थळी यंदा प्रथमच महाशिवरात्री साजरी करण्यात येणार आहे. मुळगाव येथील खाणीच्या पायथ्याशी हे श्रद्धास्थान असून या स्थळाला पांडवकालीन इतिहास असल्याचा अंदाज आहे. झाडाझुडपांनी वेढलेल्या या परिसराची सध्या स्थानिकांकडून साफसफाई करण्यात आली असून महाशिवरात्री साजरी करण्यासाठी ग्रामस्थ सज्ज झाले आहेत.

कारापूर येथील श्री महादेव देवस्थानात वर्षपद्धतीप्रमाणे महाशिवरात्री उत्साहात साजरी करण्यात येणार आहे. त्यानिमित्त दोन दिवस भरगच्च कार्यक्रमांचे आयोजन करण्यात आले आहे. यानिमित्त मंगळवारी (ता. २५) संध्याकाळी मंदिरात धार्मिक विधी, तसेच मुलांसाठी वेशभूषा स्पर्धा घेण्यात येणार आहे. रात्री ९ वा. फोंडा येथील श्री शांतादुर्गा शिवरंजनी कला संघातर्फे समईनृत्य होणार आहे. रात्री १० वा. रवळनाथ क्रिएशन करमळी प्रस्तुत ‘टाईम फेल’ हे नाटक सादर करण्यात येणार आहे. बुधवारी (ता. २६) महाशिवरात्रीनिमित्त सकाळपासून भक्तांसाठी मुक्तद्वार व अभिषेक होईल. तद्‍नंतर मंदिरात धार्मिक विधी. दुपारी सार्वजनिक लघुरुद्र व नंतर भजनाचा कार्यक्रम होणार आहे आणि संध्याकाळी ६.३० वा. हरीपाठ होणार आहे. नंतर रात्री ९ वा. महाप्रसादाचा कार्यक्रम होईल.

वाठादेव-डिचोली येथील श्री वाठादेव देवस्थानात बुधवारी (ता. २६) महाशिवरात्री विविध कार्यक्रमांनिशी साजरी करण्यात येणार आहे. सकाळी ६ वा. श्रींस अभिषेक करण्यात आल्यानंतर दिवसभर भक्तभाविकांसाठी श्रींस स्वहस्ते अभिषेक करण्याची संधी मिळणार आहे. सायंकाळी श्रींची पूजा, प्रार्थना व तीर्थप्रसाद होणार आहे. रात्री ८ वा. सांस्कृतिक कार्यक्रम होणार आहेत.