पश्‍चिम बंगालमधील कोलकाता शहरातील एका इस्पितळात सेवा देणाऱ्या डॉक्टर तरुणीवर अत्याचार करुन हत्या करण्याच्या प्रकारामुळे सारा देश ढवळून निघाला आहे. देशभरात डॉक्टर्ससह सामान्य नागरिक रस्त्यावर उतरले आहेत. या प्रकरणातील आरोपीला तात्काळ कडक शिक्षा देण्यात यावी अशी मागणी केली जातेय. तर दुसरीकडे, आता या प्रकरणाचा तपास सीबीआयने हाती घेतला आहे. काही दिवसांपूर्वीच, पश्चिम बंगालच्या मुख्यमंत्री ममता बॅनर्जी यांनी निवासी डॉक्टरांच्या मोर्चाला संबोधित करताना तुमची इच्छा असेल तर या प्रकरणाचा तपास तुम्ही सांगाल त्या एजन्सीकडून करण्यात येईल असे सांगितले होते. यातच आता, या प्रकरणाची दखल सर्वोच्च न्यायालयानेही घेतली. न्यायालयाने डॉक्टरांच्या सुरक्षेसाठी टास्क फोर्स स्थापन करण्याचे निर्देश दिले आहेत.